Foto: Akmaty.tv
Almatynyń Irgeli aýylynda bala mektep avtobýsynyń astyna túsip, qaza tapqannan keiin turǵyndar narazylyqtaryn jetkizý úshin kóshege shyqty. Aitýynsha, bilik ókilderi mektep salyp beremiz dep on jyldan beri áli ýáde berip keledi. Qazirgi tańda balalar kórshi aýyldarda oqýǵa májbúr, dep habarlaidy Orda.kz.
Aita keteiik, qaiǵyly oqiǵa 27 qarasha kúni «Asyl Arman» turǵyn úi kesheniniń aýmaǵyndaǵy turaqta bolǵan. Mektep oqýshylaryn tasymaldap júrgen shaǵyn avtobýs segiz jastaǵy balany qaǵyp ketken. Bala oqiǵa ornynda kóz jumǵan.
Qaitys bolǵan bala kópbalaly otbasynyń tuńǵysh edi, aldaǵy kúnderi toǵyz jasqa tolýy kerek bolǵan.
Bul tragediia turǵyndardyń shydamyn taýysqan sońǵy tamshy boldy. Olar qaiǵyly oqiǵa ornyna jinalyp, óz narazylyqtaryn bildirdi.
«Balalar avtobýsqa úlgerý úshin asyǵady. Bir avtobýsta 50-ge jýyq oqýshy tasymaldanady. Bul turǵyn úi kesheninde 20 myń adam turady. On jyldan beri mektep salýdy surap kelemiz, biraq tek ýádemen toidyrady. Bul — bilik ókilderiniń úlken jaýapsyzdyǵy. Balalarymyz kórshi aýylǵa baryp oqýǵa májbúr. Búgingi qaiǵyly oqiǵa úshin kim jaýap beredi? Bilik ýádesin oryndaýy kerek. Halyqtyń talabyn elemeý — qylmys!» — deidi ashynǵan turǵyndar.
Qarasai aýdany ákimdigi mektep qurylysy birneshe jyl buryn bastalǵanyn, alaida qarjylandyrý máselesine bailanysty toqtap qalǵanyn málimdedi.
Qaitys bolǵan bala Lev Tolstoi atyndaǵy mektepte oqyǵan. Oqýshylardy tasymaldaýmen «Dáýlethanov» jeke kásipkerligi ainalysady. Tek «Asyl Arman» kesheniniń ózinen kún saiyn 400-ge jýyq oqýshy tasymaldanady.
Qazirgi ýaqytta politsiia oqiǵaǵa bailanysty sotqa deiingi tergeý júrgizýde. Mikroavtobýs júrgizýshisi qamaýǵa alyndy.
Aita keteiik, «Asyl Arman» turǵyn úi keshenindegi máseleler jii kóterilip keledi. Biyl naýryzda turǵyndar jylý men ystyq sýdyń joqtyǵyna bailanysty joldy jaýyp tastaǵan bolatyn. Mamyr aiynda olar jańa kópqabatty úidiń qurylys jumystaryna qarsy shyqqan edi. Turǵyndar infraqurylymnyń shamadan tys júktelgenin aityp, shaǵymdanǵan.
Áleýmettik nysandardyń joqtyǵy týraly turǵyndar uzaq ýaqyttan beri aityp keledi. Aýyl halqy ósip jatqanymen, mektep pen balabaqsha áli kúnge deiin salynbaǵan.
