Qazaqstandyqtar shildeniń 27-sinen 28-ine qaraǵan túni XXI ǵasyrdaǵy erekshe astronomiialyq qubylys aidyń tutylýy men Marstyń jer betine barynsha jaqyndaýyn tamashalady. Bul qubylystyń adam ómirine qalai áser etetinin astrolog Irina Abdraimova aityp berdi, dep jazady Sputnik agenttigi.
Astrologtyń aitýynsha, aidyń tolyq tutylýy kúnniń eki ret jartylai tutylý qubylystarynyń arasyna dóp túsip otyr. Kúnniń birinshi tutylýy 13 shildede bolsa, ekinshisi 11 tamyzda bolady.
"Aidyń tutylýy kúrdeli saldarlarǵa ákep soǵýy múmkin, qarjylyq qiyndyqtar, adamnyń jeke basynda problemalar týyndaidy. Negizinen bizdiń ishki jan dúniemizge áser etedi. Ásirese áielderge yqpaly zor, jeke jáne otbasylyq, psihologiialyq jaǵdaiyna áserin tigizedi. Jalpy ai adamnyń beisanasyna tikelei yqpal jasaidy, sol sebepti sanamyzdyń qaltarystarynda tereń saqtalǵan qorqynysh, úrei men renishimizdi syrtqa shyǵaramyz. Óte sezimtal bola bastaimyz, ásirese, áielder jaǵy. Adam bolmashy nárseni kóńiline alyp, ókpelep qalýy múmkin. Jalpy zorlyq-zombylyqqa, ópshendilikke, ashýshańdyqqa, shydamsyzdyqqa beiim keledi", — deidi Irina Abdraimova.
Astrologtyń sózine súiensek, ai tutylýynyń balalarǵa da yqpaly zor — bul kezde olar tym erke bolyp, til almai, mazasyzdanýy múmkin.
Sonymen birge, adamdardyń basym kópshiliginde júike jáne júrek-qan tamyry derti qozyp ketýi de yqtimal.
Jalpy bul kezeńde adam óziniń ómirinde bolyp jatqan jaittarǵa yqpal ete almaidy. Jeke ómirinde de, tipti jahandyq saiasi máseleler de adamnyń erkine baǵynbaityn oqiǵalar bolýy múmkin. Sol sebepti minez-qulqymyzdy ózgertip, ishki jan dúniemizge qarai sheshim qabyldaýymyz kerek.
"Aidyń tutylýy, ásirese, 24 jáne 28 shilde, qazan, qańtar, sáýir ailarynda týǵan adamdarǵa erekshe yqpal etedi. Bul óte mańyzdy. Aldaǵy 18 jylǵa taǵdyrdy ózgertýge airyqsha múmkindik týady. Eki tutylý arasyndaǵy kezeń adam taǵdyryn ózgertýge eń qolaily merzim bolyp sanalady. Ol úshin nyq sheshim qabyldap, shyn júrekten niet etip, búkil energiiańyzdy ǵaryshqa baǵyttaýyńyz kerek. Sonda aldaǵy 18 jyldyq ómirińiz ózgeredi. Zorlyq-zombylyq, urys-keristen boiyńyzdy aýlaq ustap, ainalańyzdaǵylarǵa mahabbat pen meirim syilańyz. Jaqyndaryńyzǵa kómektesińiz. Sonda baqytty bolasyz", — dep oiyn túiindedi astrolog.
