Qazaqstan astanasynyń Alataýdan Arqaǵa kóshirý isine belsendi atsalysqan memlekettik qyzmetkerlerdiń biri - Mirbolat Jaqypov. QR Prezidenti Ákimshiliginiń jalpy bólimin 1996-2018 jyldar aralyǵynda basqarǵan ol toqsanynshy jyldardyń ishindegi estelikterimen bólisti.
Mirbolat Jaqypov qazir memlekettik bank mekemeleri jáne qoǵamdyq qyzmet kórsetý qyzmetkerleriniń sapalyq kásipodaǵynyń tóraǵasy. «Antikor LIVE» jobasynda qazirgi jas býyn bile bermeitin qyzyqty áńgimelerdi aityp berdi.
«Buryn Astana kúnin 10 maýsymda toilaityn edik. Elordamyzdyń birinshi jyldyǵyn dál sol kúni atap ótkenimiz esimde. Kún salqyn boldy, jańbyr jaýyp turdy. Almatydan kelgen biz ábden tońyp qalǵanbyz. Arqadaǵy aýa-raiyna sol tusta beiimdele bastadyq. Jalpy Astana kúniniń 6 shildege aýysýynyń birneshe sebebi bar. Joǵarǵy keńes eń alǵashqy resmi sheshimdi 1994 jyly 6 shildede qabyldaǵan bolatyn. Tarihtan biletinderińizdei, bul sheshim óte qiyn ótti. Ábish Kekilbaev aǵamyzdyń esteliginen oqyp kórseńiz kózińiz jetedi. 6 shilde Elbasynyń týǵan kúni bolǵannan keiin depýtattardyń kóbi «syilyq jasaiyq» dep daýys berip, sheshim qabyldanǵan», - dep eske alady ótken ýaqytty Mirbolat Jaqypov.
Jalpy sol kezde memlekettik apparattyń Almatydan Nur-Sultanǵa kóshýi «óte kóp ári qyzyqty áńgime» deidi ol.
«Kezinde osy úlken sharýaǵa aralastym. Jumystarǵa jaýapty da boldym. Eldiń astanasyn Almatydan kóshirý úshin úlken memlekettik komissiia quryldy. Tájiribeli basshylar bul aýqymdy sharýanyń basy-qasynda júrdi. Osynyń arqasynda úsh jyldyń ishinde úlken daiyndyq jumystary júrgizilip, kóship keldik. Biraq kóshkenge deiin birqatar máseleni retteý kerek boldy. Ol kezde Aqmolaǵa astanany kóshirý isine birtalai jurt qarsy edi. 1994 jyly el áli daǵdarystan shyqpaǵan kezeń. Infliatsiia 2265 paiyzǵa ketti. Ailyǵymyz ortasha eseppen 24 dollar bolatyn. Halqymyzdyń 35 paiyzy ol kezde kedei ómir súrdi. Qiyn kezeń. Biraq soǵan qaramastan Elbasy jigerli sheshim qabyldady», - dedi ol.
Mirbolat Jaqypov astanany Aqmolaǵa kóshirý bastamasyna jurtshylyq qarsy bolmaǵanymen, memlekettik apparattyń ishinde bul sheshimge kóńili tolmaǵandar bolǵanyn aitady.
«Premer-ministrdiń ózi qarsy boldy. Ol tusta Úkimet basshysy Ákejan Qajygeldin myrza edi. Bir mysal keltire keteiin: Prezident bir Jarlyqqa qol qoiar aldynda qolbelgiler jinaimyz. Sol vizalardyń birin Prezident maǵan «Úkimet basshysyna óziń kirip, vizasyn alyp shyq» dep tapsyrdy. Ol Jarlyq astanany kóshirý týraly sharýalardyń bir bóligi edi. Úkimet basshysy «qoimaimyn» dedi. «Sizdiń vizańyz bolmai ketpeimin» dep otyryp aldym. «Qalai sonda? Qoimaimyn» dep otyryp aldy. «Joq, siz qoiǵansha otyramyn» dedim. Jarty saǵat júrdi, turdy, otyrdy, terezege baryp qarady. «Áli otyrsyń ba?» dedi. Aqyry urysty, burqyldady, biraq qoiyp berdi. Sondai jaǵdailar bolǵan», - deidi ol.
Mirbolat Jaqypov ol tusta Alataýdan Arqaǵa qonys aýdaratyn memlekettik qyzmetkerlerdiń 25 paiyzyn iriktep alý týraly tapsyrma bolǵanyn eske alady. Eń tájiribeli mamandardy irikteý mindeti turdy.
«Memlekettik qyzmetkerlerdi iriktep aldyq. Eskerttik. Qalǵandarǵa Almatyda jumys taýyp berýge tyrystyq. Álbette munyń bári psihologiialyq turǵyda ońai timeitin jumys boldy. Jańa astanaǵa barǵysy kelmegender de bar edi. Biraq maman retinde olar bizge kerek bolatyn. Tipti keibir memlekettik qyzmetshilerdiń jubailaryna deiin úgittep, balalaryńyzdy oilańyzdar dep sóilestik. Jastar qalasy dedik», - dedi ol.
Almatyda ol tusta halyq kóp bolyp ketken eken. 2000 jyldarǵa jetpei halyq sany millionnan asyp ketken. Kóshedegi keptelister sol kezdiń ózinde bar.
«Almaty elimizdiń eń shetinde, bir buryshynda ǵana tur. Basqa oblystarǵa alys. Geosaiasi jaǵynan da astanany Arqaǵa kóshirý tiimdi boldy. Astanany qai jerge aýystyramyz degen kezde nusqalar kóp boldy. Mamandardan 17 usynys keldi. Elbasy kóp oilandy. 17 nusqa barlyq parametr boiynsha taldandy. Ainalyp kelip sheshim Aqmolaǵa toqtaldy», - deidi ol.
Mirbolat Jaqypov qazirgi Nur-Sultannyń Aqmola óńirinde boi kóterýiniń tarihyn jastar bilmeýi múmkin ekenin atap ótti.
«Kez kelgen elde «qosymsha astana» bolady. Máselen Sovet odaǵynyń qosymsha astanasy – Kýibyshev, qazirgi Samar qalasy. Al Qazaqstannyń qosymsha astanasy – Aqmola boldy. Ony kóbi bilmeidi. Sebebi kezinde qupiia boldy. Qazir aitýǵa bolady. Jańadan 32 parametr boiynsha Saryarqanyń tórinde osylaisha astanamyz boi kóterdi», - dedi ol.
.jpeg)