Nur-Sultan qalasyn jylý jáne elektr energiiasymen ókiletti organnyń retteýi arqyly jabdyqtaityn «Astanaenergosbyt» kompaniiasy elektr qýatynyń bólshek saýdadaǵy tarifin 7 paiyzǵa ósirýdi surap júr. Búgin qalalyq Tabiǵi monopoliialardy retteý departamentinde osy máselege bailanysty qoǵamdyq tyńdaý ótti, dep habarlaidy QazAqparat.
Bólshek saýdadaǵy elektr tarifin kóterý týraly usynystyń neden paida bolǵanyn «Astanaenergosbyt» JShS bas direktorynyń ekonomika jáne qarjy jónindegi orynbasary Janna Gisler túsindirdi.
Onyń málimeti boiynsha, shekti baǵany ulǵaitý týraly ótinishpen shyǵýǵa mynadai faktorlar sebep bolǵan:
- energiia berýshi uiymdar tarifteriniń ósýi;
- jańartylatyn energiia kózderin qoldaýǵa ústemeaqynyń ósýi;
- elektr qýatynyń daiyndyǵyn qamtamasyz etý boiynsha qyzmet qunynyń ósýi;
- 2021 jylǵa saralanǵan tarifterdi qoldanýdan alynbaǵan kiris;
- 2020-2021 jyldarda elektr energiiasy mne qýattardy satyp alý jáne tasymaldaý boiynsha bekitilgen baǵa men naqty baǵanyń aiyrmashylyǵyna bailanysty týyndaǵan shyǵyndar.
Janna Gisler atalǵan ár sebepke qysqasha toqtalyp ótti. Aitýynsha, biyl 1 qyrkúiekten bastap 1 KVt/saǵ elektr qýatyn tutynǵany úshin alynatyn tólemniń shekti tarifi 19,84 teńge bolyp bekitilgen. Kásiporyn endi sony 21,13 teńgege deiin kóterýdi surap otyr. Iaǵni, ósim orta eseppen 7% nemese +1,29 teńge bolady degen sóz.
«Birinshiden, elektr energiiasyn satyp alýdyń ortasha baǵasy 1 KVt/saǵ energiia úshin 0,03 teńgege nemese 0,04% qymbattady. Al jańartylatyn energiia kózderin qoldaýǵa arnalǵan ústemeaqy tarifi 1,57 teńgeden 1,58 teńgege nemese 0,6% ósti. Tek elektr energiiasyn óndirýdiń shekti tarifteri ózgerissiz qaldy. Ekinshiden, elektr qýatynyń daiyndyǵyn qamtamasyz etý qyzmetteriniń quny 3% nemese 1 MVt elektr qýaty úshin 692,3 myń teńgeden 711,4 myń teńgege deiin ósti. Úshinshiden, energiia berýshi uiymdar tarifti ósirip, sonyń áserinen tasymaldaý tarifi orta eseppen 1 KVt/saǵ energiia úshin 0,63 teńgege nemese 8% qymbattady», - dedi «Astanaenergosbyt» kompaniiasynyń ókili.
Jalpy málimetten jalqyǵa oiyssaq, mynadai ahýal qalyptasyp otyr. Elektr jelilerine qyzmet kórsetetin «Astana-AEK» AQ tarifi 1 KVt/saǵ energiia úshin 6% nemese 4,23 teńgeden 4,50 teńgege deiin ósirgen. Al «Aqmola elektrojelilik úlestirý kompaniiasy» AQ tarifin 6% nemese 5,08-den 5,36 teńgege deiin kótergen.
«KEGOK» AQ tarifi 15% nemes 2,448-den 2,811 teńgege deiin artqan.
Teńgerimdeýshi elektr energiiasynyń shekti tarifi 19% nemese 0,086-dan 0,102 teńgege ósken.
«Tutynýshylardan paidalanǵan energiianyń kólemine bailanysty bekitilgen saralanǵan tarif boiynsha 2021 jyly qosymsha 495,7 mln teńgeniń kirisi alynbai qaldy. Al elektr energiiasyn satyp alý jáne tasymaldaý boiynsha bekitilgen baǵa men naryqta naqty qalyptasqan baǵanyń aiyrmashylyǵynan 884,9 myń teńge shyǵyn keldi. Bul jerde 2018-2020 jyldar aralyǵyndaǵy shyǵyndy aityp otyrmyz», - dedi Janna Gisler.
Osylardy alǵa tartqan «Astanaenergosbyt» kompaniiasy saralanǵan tarifti 2022 jyldyń qańtarynan bastap mynadai kólemde bekitýdi usynyp otyr:
- qarapaiym turǵyndar úshin 1 KVt/saǵ elektr energiiasynyń qunyn 14,54 teńge etý (+7%);
- biýdjettik uiymdardan basqa zańdy tulǵalar úshin 21,13 teńge etý (-6%);
Biýdjettik uiymdar úshin 85,89 teńge etý (+35,89 teńge).
Nur-Sultan qalasy Tabiǵi monopoliialardy retteý departamentiniń basshysy Bolat Tanabergenov atalǵan ótinim boiynsha naqty sheshim áli shyqpaitynyn eskertti.
«1 qyrkúiekten bastap «Astanaenergosbyt» kásipornyna 19 teńge 80 tiyn shekti tarif bekitilgen. Ony 2022 jyldyń 1 qańtardan bastap 6,5 paiyz kóterýdi surap otyr. Ótinim qaralýda. Jańa jyldan bastap tarif ósedi dep naqty aita almaimyz. Naqty sheshim jyl aiaǵyna deiin qabyldanady. Búgingi talqylaýda aitylǵan eskertýler men usynystardyń bári sheshim shyǵarar kezde eskeriledi», - dedi departament basshysy.
Nur-Sultan qalasynyń aýmaǵynda «Astanaenergosbyt» JShS-dan basqa 10-nan astam energiia ótkizý kompaniiasy jumys isteidi. Biraq olardyń qyzmetin tabiǵi monopoliialardy retteý organy rettemeidi. Degenmen memleket «Astanaenergosbyt» JShS-nyń tarifin retteý arqyly jalpy naryqtaǵy baǵany baqylap otyr deýge bolady.
