Búgin Nur-Sultanda elorda ákiminiń orynbasary Baqtiiar Máken men iri saýda ortalyqtary men bazar basshylary arasynda kezdesý ótti, dep habarlaidy "Ult aqparat".
Qalalyq ákimdiktiń málimetinshe, bas sanitar dáriger Janna Pirálieva óz sózinde atap ótkendei, elordada indet juqtyrý jaǵdailary jiilegeni baiqalady. Bul, basqalarmen qatar, ShOB ókilderi men azamattardyń karantin tártibin óreskel buzýymen bailanysty.
«Profilaktikalyq jumystarǵa qaramastan, kásipkerlik sýbektileri karantin tártibin buzýda, buqaralyq is-sharalar ótkizilýde, mekemelerdiń jumys kestesi buzylǵan. Sonymen qatar, qalada aýrý sany artyp keledi. Bul degenimiz - biz jasyl aimaqtan alshaqtaimyz. Aýrý jaǵdailary mektep jasyndaǵy jáne bir jasqa deiingi balalar arasynda da tirkelýde», - dedi Janna Pirálieva.
Negizgi qaýipsizdik erejelerin elemeý COVID-19 ekinshi tolqynyna ákelýi múmkin. ShOB ókilderi men qala turǵyndary sanitarlyq normalardyń saqtalýyna úlken jaýapkershilikpen qaraýy kerek.
«Ár aimaq óz deńgeiinde sheshim qabyldaidy. Biz sondai-aq biznestiń jumys istegenin qalaimyz, biz bul jumys, tabys jáne ekonomika ekenin túsinemiz. Biraq kásipkerler óz tarapynan talaptardy oryndaýy kerek. Keibir saýda ortalyqtary maska taǵý tártibin saqtamaidy jáne temperatýrany teksermeidi. Qabyldanyp jatqan sharalarǵa túsinistik tanytýdy suraimyz, bizdiń ortaq mindetimiz - eń aldymen aýrýdyń qaita órýshiniń aldyn alý», - dedi Nur-Sultan qalasy ákiminiń orynbasary Baqtiiar Máken.
Jiyn sońynda saýda ortalyqtarynyń demalys kúnderindegi jumysyn qaita qalpyna keltirý qaladaǵy epidemiologiialyq jaǵdaiǵa jáne ShOB-tyń sanitarlyq normalardy saqtaýyna bailanysty bolatyny aityldy.
Demalys kúnderi saýda-oiyn-saýyq ortalyǵynyń jumysyn qalpyna keltirý tolyǵymen nysandardyń barlyq sanitarlyq normalardy saqtaýǵa daiyndyǵyna bailanysty.
Ár azamattyń jaýapkershiligi epidemiologiialyq jaǵdaiǵa áser etedi, sondyqtan barlyq elordalyqtardy karantin sharalaryn qatań saqtaýǵa shaqyramyz.
