Foto: Astana ákimdigi
Astana qalasyndaǵy aqyly avtoturaqtar tolyqtai ákimdik menshigine ótti. Bul týraly qala ákiminiń orynbasary Ersin Ótebaev málimdedi, dep habarlaidy Ult.kz.
Onyń aitýynsha, buǵan deiin turaqtardy basqarǵan kompaniiamen bailanysty saýyqtyrý rásimi sot sheshimimen toqtatylǵan. Sonymen qatar taraptar arasynda turaqtardy berý jónindegi qosymsha kelisimge qol qoiylǵan.
«Aqyly avtoturaqtar ákimdik qaramaǵyna ótti deýge bolady. Qazirgi tańda negizgi kelisimderdi aiaqtaý jumystary júrip jatyr. Jaqyn kúnderi sońǵy qujattarǵa qol qoiylady», dedi Ótebaev.
Ákimdik ókili aqyly turaqtardyń naqty qansha tabys ákeletinin ázirge aitý qiyn ekenin atap ótti. Degenmen, joba iske qosylǵaly beri aiyppuldarmen birge 5 mlrd teńgeden astam kiris túskeni belgili.
Eske salsaq, 2025 jyldyń jeltoqsanynda ákimdik pen Astananyń turaq keńistigi JShS arasynda aldyn ala kelisim jasalǵan. Qujatqa sáikes, kompaniia óz úlesiniń 100 paiyzyn jergilikti atqarýshy organǵa qaitarymsyz negizde berýi tiis.
