Astanadaǵy bir páterde 937 adam tirkelgen. Biraq onda bir ǵana otbasy turady. Almaty oblysynda da osyndai 13 myń fakti anyqtaldy. Bul týraly "Ult aqparat" Astana arnasyna silteme jasap habarlaidy.
Astana qalasynda bir mekenjaida tym kóp turǵyn tirkelgen 924 baspana tekserildi. Olarda 35 myńdai adam tirkeýde turǵany áshkere boldy. Iaǵni, bir ǵana páterdiń ózinde 800-den astam adam, ekinshisinde – 600-den astam azamat, úshinshisinde – 400-den astam adam turaqty tirkelip, turyp jatqan bolyp shyqty.
"Jaqynda 35 sharshy metr úige 930 dan astam migranttardy tirkeý boiynsha qylmystyq is qozǵaldy. Jalǵyzbasty ana migranttardy tirkeý arqyly olardan aqsha alǵan. Osyndai árketke barǵany úshin qylmystyq jaýapkershilikke tartylady", – deidi qalalyq prokýratýra basqarma bastyǵynyń orynbasary Nursultan Qudabaev.
Kóshi-qon qyzmetiniń qyzmetkerleri 40-qa jýyq hattama jasap, onyń ishinde 6 tártip buzýshyny qaitadan jaýapkershilikke tartqan.Turǵyn úi ieleriniń ótinishi boiynsha osy mekenjailarda turmaityn, biraq tirkelgen Qazaqstan Respýblikasynyń azamattary esepten shyǵaryldy.
"5 aidyń qorytyndysy boiynsha 1426 adam ákimshilik jaýapkershilikke tartyldy. 3 jyldan 7 jylǵa deiin bas bostandyǵynan aiyrý kózdelgen", – deidi qalalyq prokýratýranyń basqarma tóraǵasy Aian Abdynasyrov.
Aita keteiik, zańnamada bir mekenjai boiynsha tirkelgen azamattardyń sanyna shekteýler qarastyrylmaǵan. Degenmen, tirkelgen azamattar tirkelgen jerinde naqty turýǵa mindetti.
