Foto: uiymdastyrýshylardan
Astananyń Qalalyq alańynda Ekinshi dúniejúzilik soǵystaǵy Jeńistiń 80 jyldyǵyna arnalǵan merekelik kontsert ótti. Bul shara bolashaq urpaqtyń erkindigi men táýelsizdigi úshin janyn qiǵan qaharmandardyń rýhyna taǵzym etip, olardyń erligin máńgi este saqtaýǵa baǵyttaldy, dep habarlaidy Ult.kz.
Merekelik is-sharany "Eýraziialyq monitorin" Qazaqstan ortalyǵy uiymdastyryp, elordaǵa jinalǵan myńdaǵan turǵyn men qala qonaqtary soǵys qaharmandaryna qurmet bildirý úshin bas qosty.
Kontsert Uly Otan soǵysynyń qaharmandaryna taǵzym retinde ótti. Erligimen el jadynda qalǵan Talǵat Bigeldinov, Sergei Lýganskii, Saǵadat Nurmaǵambetov, Ivan Panfilov, Baýyrjan Momyshuly, Núrken Ábdirov, Málik Ǵabdýllin, Sabyr Rahymov, Mánshúk Mámetova, Áliia Moldaǵulova, Rahymjan Qoshqarbaev, Hiýaz Dospanova syndy erlerdiń esimderi erekshe ataldy.
Kontsert barysynda maidan ánderi, áskeri marshtar men zamanaýi patriottyq týyndylar shyrqaldy. Sonymen qatar soǵys ardagerleriniń shynaiy hattary men estelikterine negizdelgen teatrlandyrylǵan kórinister qoiylyp, kórermenge tereń áser qaldyrdy.
Foto: uiymdastyrýshylardan
Sahnada tanymal qazaqstandyq ártister men shyǵarmashylyq ujymdar, sondai-aq jas oryndaýshylar óner kórsetti. Olar soǵys jyldaryndaǵy halqymyzdyń qaisar rýhyn, birligin jáne erligine degen alǵys sezimin jetkizdi. Ásirese, poeziia men mýzyka úndesken áserli kórkem qoiylymdar kórermendi bei-jai qaldyrmady.
Bul kesh – tarihi jadymyzdy jańǵyrtyp, erlik pen otansúigishtik uǵymdaryn urpaq sanasyna sińirýge baǵyttalǵan taǵylymdy shara boldy.
"Búgin biz Astananyń júreginde – Qalalyq alańda jinalyp, Jeńistiń 80 jyldyǵyn erekshe qurmetpen atap ótýdemiz. Bul — barsha adamzat tarihynda óshpes iz qaldyrǵan Uly Jeńis. Mýzyka, sóz ben jaryq sahnada úilesip, ómirin qurban etken erlerge degen tereń qurmettiń simvolyna ainaldy", — dedi "Eýraziialyq monitoring" ortalyǵynyń direktory Álibek Tájibaev.
Tek Astanada ǵana emes, osy sátte álemniń túkpir-túkpirinde batyrlardyń urpaqtary uiymdastyrǵan merekelik kontsertter men saltanatty is-sharalar ótýde.
"Biz maidanger qaharmandar men eńbek armiiasynyń tyldaǵy erleriniń aldynda bas iemiz. 1941 jyldyń otty shebinde Otanyn qorǵaýǵa attanǵan árbir jaýyngerge, al tylda jeńisti jaqyndatqan árbir eńbek adamyna máńgilik taǵzym. Qazaqstannan 1 million 200 myńnan astam jerlesimiz maidanǵa attandy, olardyń 500-den astamy Keńes Odaǵynyń Batyry atandy. Talǵat Bigeldinov, Baýyrjan Momyshuly, Mánshúk Mámetova, Áliia Moldaǵulova syndy erlerdiń esimi el jadynda máńgilik saqtalady", — dep sózin túiindedi Álibek Tájibaev.
