Elorda ákimi Altai Kólginov 2022 jyly qalada jańa infektsiialyq aýrýhana salynatynyn aitty, dep habarlaidy QazAqparat.
«Kovidpen kúres aiasynda 16 statsionar jumyldyrylǵan edi. Birinshi qalalyq aýrýhanany koronavirýspen kúreske tarttyq, sondai-aq úshinshi qalalyq aýrýhanany, temirjol aýrýhanasy, barlyq gospitalder qamtyldy. Qazirgi kezde indettiń taralý deńgeii tómendedi, alaida kelesi tolqyn qashan bolatynyn kim biledi?!» - dep toqtaldy A. Kólginov elorda máslihatynyń kezekten tys sessiiasynda.
Osy oraida ol qalaǵa taǵy bir infektsiialyq statsionar kerek ekenin aitty.
«KVI-men jáne basqa da infektsiialarmen kúres boiynsha bizge jańa statsionar kerek bolyp tur. Bizde tiisti tapsyrma bar, qazir osy másele turǵysynda jumys istep jatyrmyz, jobalaý-smetalyq qujatnama ázirlenip jatyr. Dárigerler men naýqastarǵa qolaily jaǵdai jasaý úshin onda tiisti nysandar eskeriledi», - dedi qala ákimi.
Budan buryn habarlanǵandai, 2022 jyly elordada eski úilerdegi turǵyndardyń máselesi sheshiledi.
