Astana qalasynyń ákimi Áset Isekeshev Feisbýktaǵy paraqshasynda sý tasqyny qaýpi tolyq baqylaýda ekendigin málim etti, dep habarlaidy QazAqparat.
Shahar basshysy qala ákimdiginde QR Aýyl sharýashylyǵy ministrligi Sý resýrstary komiteti ókilderiniń, Sátpaev atyndaǵy qalalyq kanal basshylyǵy jáne basqa da arnaiy qyzmet ókilderiniń qatysýymen baspasóz maslihaty ótkenin eske salyp ótti. Shara barysynda mamandar Astana sý qoimasynda qalyptasqan jaǵdaidy kópshilikke túsindirip ótti.
«13-15 sáýir kúnderi tolassyz jaýǵan jańbyrǵa bailanysty Esil ózenine 340 mln. tekshe metr kólemde sý qosyldy. Qazgidromet ortalyǵynyń mamandary 100-160 mln. tekshe metr kóleminde sý keledi dep boljaǵan edi. Alaida kúnniń kúrt jylynýyna bailanysty qardyń erýi de jyldamdap ketti. Osy sebepti tasqyn sý qory kútken kólemnen mol boldy», - dedi QR AShM Sý resýrstary komitetiniń tóraǵasy Islam Ábish.
Onyń aitýynsha, qazirgi sátte mamandardyń kúsh salýynyń arqasynda 340 mln. tekshe metr sýdyń 90 mln. tekshe metri Astana sý qoimasyna buryldy. Qalǵan 250 mln. tekshe metr sý kontr retteýshige baǵyttaldy.
«17 sáýirde saǵat 11-den bastap 1 200 tekshe metrge deiin sý keldi. Bul óte joǵary deńgei. Keiin aǵys qarqyny 1 044 tekshe metrge tústi. Qazir Astana sý qoimasyna kelip jatqan sýdyń kólemi sekýndyna 150-200 tekshe metrdi qurap otyr. Osy oraida onyń barlyǵyn sý qoimasynda saqtap qalý múmkindigimiz bar. Astana sý qoimasynyń syiymdylyǵy 410 mln. tekshe metr bolsa, onda qazir 385 million tekshe metr sý toltyrylǵan, iaǵni taǵy 25 mln. tekshe metr jinai alamyz.
Osy sátte jaǵdai baqylaýda, Astanaǵa jaqyn mańdaǵy eldi mekenderdi sý basý qaýpi joq», - dep málimdeidi I. Ábish.
Qazirgi tańda Astanada sý tasqynyna qarsy jedel shtab jumys istep jatyr. Olar atqarylatyn jumystardyń keshendi josparyn júzege asyrýda.
