Foto: Polisia.kz
Elordada esirtki qylmysyna qarsy kúres basqarmasynyń qyzmetkerleri asa iri kólemde esirtki satýdyń jolyn kesti, – dep habarlaidy Polisia.kz.
"Kúmisbekov kóshesindegi úidiń janynan Range Rover avtokóliginiń júk salǵyshynda kúshti sintetikalyq esirtki zaty – mefedronnyń eki paketin tasymaldap kele jatqan 35 jastaǵy jergilikti turǵyn ustaldy" - delingen habarlamada.
Tergeý anyqtaǵandai, er adam esirtkini Almatydan satyp alyp, kólikpen Astanaǵa jóneltip, ózi elordaǵa ushaqpen oralǵan. Ári qarai ol esirtkini bir keliden bólip, Kókshetaý, Petropavl jáne Pavlodar qalalarynda iri mólsherde kóterme saýda úshin jasyryp ketýdi josparlaǵan. Kúdikti esirtkini orap-túiý úshin tasymaldaý barysynda ustalǵan.
Onyń páterin tintý kezinde eki keli gashish, bir million teńgeden asa qarajat, sondai-aq elektrondy tarazylar men býyp-túiýge arnalǵan materialdar alynǵan.
Ishki ister ministrliginde atap ótkendei, tárkilengen esirtkiniń salmaǵy asa iri mólsherge jatady. Olardyń ainalymy úshin múlki tárkilenip, 15 jylǵa deiin bas bostandyǵynan aiyrý jazasy kózdelgen.
Qazirgi ýaqytta izdestirý sharalary jalǵasýda, ustalǵan azamattyń qylmystyq bailanystary anyqtalyp jatyr.
