Elordada Ortalyq Aziiadaǵy sport ǵylymy men joǵary bilikti mamandar daiarlaýǵa baǵyttalǵan iri bilim berý jobalarynyń biri – Qazaq ulttyq sport ýniversitetiniń resmi ashylý rásimi ótti, dep habarlaidy ult.kz.
Saltanatty shara New Era of Sport: KNUS 2026 halyqaralyq forýmy aiasynda uiymdastyryldy. Oǵan memlekettik organdardyń ókilderi, halyqaralyq sport federatsiialarynyń basshylary, olimpiadalyq qozǵalys músheleri, sheteldik joǵary oqý oryndarynyń ókilderi men sarapshylar qatysty.
Is-sharaǵa Qazaqstan Respýblikasy Týrizm jáne sport vitse-ministri Serik Jarasbaev, Birikken kúres álemi uiymynyń (UWW) prezidenti Nenad Lalovich, Halyqaralyq kibersport federatsiiasynyń (IESF) prezidenti Vlad Marineský, Dúniejúzilik dopingke qarsy agenttiktiń (WADA) ókili Rafal Pehota jáne ózge de halyqaralyq uiymdardyń basshylary qatysty.
Forým barysynda ýniversitettiń jańa kampýsy tanystyryldy. Bul sońǵy bes jyl boiy júrgizilgen jańǵyrtý jumystarynyń alǵashqy kezeńiniń aiaqtalǵanyn bildiredi. Osy ýaqyt ishinde oqý orny halyqaralyq seriktestigin keńeitip, ǵylymi áleýetin nyǵaityp, joǵary jetistikter sporty, buqaralyq sport jáne sport indýstriiasy úshin mamandar daiarlaityn zamanaýi bilim berý ekojúiesin qalyptastyrǵan.
Ýniversitettiń quryltaishysy Nurasyl Medeýdiń aitýynsha, jańa bilim ordasy Qazaqstanda sport salasyna arnalǵan zamanaýi bilim berý jáne ǵylymi platformany qalyptastyrý baǵytyndaǵy bes jyldyq júieli jumystyń nátijesi.
«Bes jyldyń ishinde ýniversitet bilimge umtylys, talant pen eńbek toǵysqan úlken ortalyqqa ainaldy. Búgin biz berik irgetas qalaǵanymyzdy maqtanyshpen aita alamyz. Aldymyzda halyqaralyq moiyndalý, ǵylym men sporttaǵy jańa jetistikter kútip tur. Qazaq ulttyq sport ýniversiteti ozyq bilim men innovatsiianyń, bolashaq chempiondar men el kóshbasshylaryn tárbieleitin mańyzdy ortalyqqa ainalady», – dedi ol.
Shara barysynda Birikken kúres álemi uiymynyń prezidenti Nenad Lalovich Qazaqstannyń álemdik kúres sportynyń damýyna qosyp otyrǵan úlesin joǵary baǵalasa, IESF prezidenti Vlad Marineský ýniversitettiń ashylýyn dástúrli sport, tsifrlyq tehnologiialar men innovatsiialyq bilim berýdi ushtastyratyn mańyzdy qadam dep atady.
Saltanatty rásimde Nenad Lalovich pen Vlad Marineskýǵa «Qazaq ulttyq sport ýniversitetiniń Qurmetti professory» ataǵy berildi. Sonymen qatar stýdentter akademiialyq adaldyq, ádil básekelestik jáne sporttyq etika qaǵidattaryn ustanýǵa mindetteitin Stýdentter hartiiasyna qol qoidy.
Forým qonaqtary ýniversitettiń ǵylymi zerthanalaryn, zertteý ortalyqtaryn, bilim berý habtaryn, tsifrlyq infraqurylymy men zamanaýi sport nysandaryn aralap kórdi.
Ýniversitet basshylyǵynyń málimetinshe, Qazaq ulttyq sport ýniversiteti aldaǵy ýaqytta sport ǵylymyn damytýǵa, jańa býyn mamandaryn daiarlaýǵa jáne halyqaralyq seriktestikti keńeitýge baǵyttalǵan óńirlik ǵylymi-bilim berý ortalyǵy retinde jumysyn jalǵastyrady.
