Foto: ashyq derekkóz
Astanada kiberqylmysqa qarsy kúres basqarmasynyń qyzmetkerleri internet-alaiaqtyqtyń iri deregin ashyp, 87 jastaǵy zeinetkerge urlanǵan 39 million teńgesin qaitaryp berdi, dep habarlaidy Ult.kz.
Oqiǵa tamyz aiynda bolǵan. Belgisiz adamdar messendjer arqyly zeinetkermen habarlasyp, ózderin politsiia men Ulttyq banktiń qyzmetkerleri retinde tanystyrǵan. Olar zeinetkerdi «páterińizdi bóten adamdar óz atyna rásimdep, satýǵa shyǵardy» dep aldap, úiin satyp, aqshany «qaýipsiz esepshotqa» aýdarýǵa úgittegen.
Alaiaqtar tipti Ishki ister ministrligi men Ulttyq bank «qylmyskerlerdi ustaýǵa baǵyttalǵan qupiia operatsiia júrgizip jatyr» dep ilandyryp, zeinetkerge eshkimge aitpaýyn eskertken. Nátijesinde, er adam rieltor arqyly páterin satyp, 39 million teńgeni kýrerge bergen.
Qylmys Qylmystyq kodekstiń 190-baby (Alaiaqtyq) boiynsha tirkelip, sotqa deiingi tergeý bastaldy. Jedel izdestirý barysynda 23 jastaǵy kúdiktiniń jeke basy anyqtalyp, ol ustaldy. Tekserý kezinde tárkilengen qarajat zeinetkerge tolyq qaitaryldy.
Politsiia málimetinshe, jyl basynan beri elordada úsh myńnan astam internet-alaiaqtyq deregi tirkelgen. Mundai qylmystardyń basty nysanasy — 50 jastan asqan azamattar. Politseiler turǵyndardy saq bolýǵa, beitanys adamdardyń qońyraýlaryna senbeýge jáne kúmándi jaǵdailarda dereý politsiiaǵa júginýge shaqyrady.
