Foto: QR MAM
2025 jyldyń 16 mamyrynan elordada «Operaliia» halyqaralyq mýzyka festivali bastaý aldy. «Astana Opera» teatrynda saltanatty qyzyl kilem jaiylyp, aldaǵy qoiylymdardan úzindiler usynyldy jáne Rolan Ptidiń birden úsh týyndysynyń premerasy qoiyldy, dep habarlaidy Ult.kz.
Osy keshte kórermen belgili frantsýz horeografynyń tanymal bir aktiden turatyn baletterin tamashalady. Atap aitsaq, «Arlezianka», «Bozbala jáne Ólim» jáne «Karmen» spektaklderi usynyldy. Qoiylymdar «Astana Opera» balet trýppasynyń kórkemdik jetekshisi Altynai Asylmuratovanyń bastamasymen sahnalandy.
Atalmysh spektaklderdi Qazaqstan sahnasyna qoiýshy-baletmeister Lýidji Bonino jáne sýretshi Jan-Mishel Dezire, otandyq assistenterimen birge alyp keldi. «Astana Opera» orkestrine Elmar Bóribaev pen Rýslan Baimýrzin dirijerlik etti. Premerada balet juldyzdary, trýppanyń jetekshi solisteri, solister men kordebalet ártisteri óner kórsetti.
Festival eki aiǵa jalǵasady. 6 maýsym kúni reseilik tenordyń qatysýymen J. Bizeniń «Karmen» operasy usynylady. Odan bólek osy aida eki jarqyn premera – P. Chaikovskiidiń «Uiqydaǵy arýy» men V. Bellinidiń «Kapýletti men Montekki» qoiylady. 29 maýsymda Qytai men Reseidiń balet juldyzdary qatysatyn gala-balet ótedi. Al shildede elordalyqtar men qala qonaqtary Dj. Pýchchinidiń «Bogema» operasy tamashalai alady. Onda Italiia men Qytaidan shaqyrylǵan solister óner kórsetedi. Sondai-aq XXI ǵasyr baleti R. Rebektiń «Qazirgi sát qansha ýaqytqa sozylady?» jáne V. Tsýkettidiń Souvenir de danse qoiylymdary usynylady.
Dj. Pýchchinidiń «Týrandot» grand-operasy Qazaqstan men Resei juldyzdarynyń qatysýymen ótedi.
Budan bólek, K. Baiseiitova atyndaǵy Kameralyq zalda birqatar kontsertter uiymdastyrylady. Atap aitsaq, Bolgariialyq skripkashy Pavel Minevtiń keshi, Salaýat Karibaev pen Aliiar Ótetleý qatysatyn violonchel kontserti, Máskeýden kelgen Elman Ernurdyń fortepianolyq solosy, qazaqstandyq kompozitorlarǵa arnalǵan vokal keshteri kópshilik nazaryna usynylady. Jalpy, kórermen úshin 30-dan astam is-shara josparlanǵan.
