«Qazaqstan» RTRK AQ quramyna kiretin «QAZAQ RADIOLARY» JShS Qazaqstan halqy Assambleiasymen birlesip «Myń alǵys» qaiyrymdylyq kontsertin ótkizdi, dep habarlaidy "Ult aqparat" kompaniianyń baspasóz qyzmetine silteme jasap.
«Sharanyń maqsaty - «Qazaq radiosynyń» «Myń alǵys» áleýmettik radiohabaryna qatysqan kómekke zárý, syrqatqa shaldyqqan keiipkerlerdiń muń-muqtajyn kóppen birge kóterip, qarjylai járdem kórsetý. Osyǵan orai, «Qazaq radiolary» seriktestigi 11 aqpannan bastap «Qaiyrymdylyqtan qalys qalma! Alǵysqa bólen!» radiomarafonyn jariialaǵan bolatyn. Qaiyrymdylyq sharasynan túsken qarajat «Myń alǵys» habarynyń úsh keiipkeri - Jansaia Pishenbaev, Jandos Berikuly, Tolǵanai Baýyrjanqyzynyń em-domyna tabystalady. Osy igi sharanyń bastaýynda turǵan «QAZAQ RADIOLARY» ujymy izgi amaldy áýeli ózderinen bastap, bir kúndik jalaqylaryn keiipkerlerimizdiń emine aýdardy. Sonymen qatar, Almatyda aqpan aiynyń 23 kúni Qurmanǵazy atyndaǵy Qazaq Memlekettik akademiialyq orkestriniń kontsert zalynda qaiyrymdylyq keshin uiymdastyrdy. Odan túsken 1,5 mln teńge kólemindegi qarajat «Myń alǵys» habarynyń keiipkeri Bolat Tuńǵatarulyna tabystaldy» delingen habarlamada.
«Alǵys aitý» kúnine orai ótken kontserttik keshtegi jáshikterden jinalǵan qarajat toqishek transplantatsiiasyn kútip júrgen Ádilet Arystan degen búldirshinge berilmek. Kesh sońynda «Ýaqyp» korporativtik qorynyń prezidenti Qairat Ázimov Ádilettiń operatsiiasyna jetpei turǵan 2.5 mln teńgeni óz moinyna alatynyn aitty. Byltyrǵy «Myń alǵystyń» keiipkeri bolǵan Arman Ardaquly esimdi búldirshinge qajetti ota shyǵynyn dintanýshy-ǵalym Qairat Joldybaiuly kóterip alǵan bolatyn.
«Qaiyrymdylyq kesh aiasynda kómekke muqtaj kópbalaly analarǵa 3 páterdiń kilti tabystaldy. Bular - «1000 teńgege baspana» uranymen kópbalaly jalǵyzbasty analarǵa úi turǵyzyp berýmen ainalysyp júrgen «Hareket» qaiyrymdylyq qorynyń 76,77,78-shi baspanasy. Budan bólek, eki bólmeli páterdiń kiltin «Asyl adam» qaiyrymdylyq qory tabystady. Páter kilti «Ózgelerge kómektesý arqyly ózińe kómektes» aktsiiasy boiynsha myń teńgemen qaiyrymdylyq jasaǵan jalǵyzbasty ananyń qyzy Marina Maksimenkoǵa buiyrdy. 2017 jyldyń sáýir aiynda «Jan jylýy» degen atpen efirge shyqqan «Myń alǵys» radiohabary arqyly keiipkerlerge osy ýaqytqa deiin 56 000 000 teńge kóleminde kómek kórsetildi» dep málim etti radionyń baspasóz qyzmetinen.
Jaqsylyqtyń jarshysy bolý muqtaj jandarǵa kómekpen ǵana ólshenbeidi. Bir-birinen kóz jazyp qalǵan, jaqyndaryn joǵaltqandardy da tabystaý - ult radiosynyń paryzy ispetti. Osy maqsatta 2017 jyldyń qazan aiynan beri talmai qyzmet etip kele jatqan «Barmysyń, baýyrym?» radiohabary efirge 70 habar shyǵaryp, 703 hat-habar alyp, 90 adamdy anyqtap, bir-birimen tabystyryp úlgerdi. Kesh barysynda 40 jyl bir-birin kórmegen áskerdegi dostar, 50 jyl kórispegen ana men bala, 15 jyl boiy urpaǵyn izdep júrgen qariia et jaqyndarymen qaýyshty.
