Nur-Sultan qalasy bilim basqarmasy erekshe muqtajdyǵy bar balalarǵa arnalǵan «Sati» balabaqshasyndaǵy tárbieshiniń óreskel áreketi týraly taraǵan videoǵa túsinikteme berdi, dep habarlaidy QazAqparat.
Instagram-da jariialanǵan shaǵymda balabaqshada balalarǵa jii qol kóterip, aiǵailap ursatyny, tipti beiádep sózder aitylatyny týraly, tamaq pen balalardyń kútimi de nashar ekeni aitylǵan.
«Qazirgi tańda Nur-Sultan qalasy politsiia departamenti balabaqsha tárbieshisiniń ústinen tárbielenýshilerge qatygezdikpen qaraý faktisi boiynsha qylmystyq is qozǵap, sotqa deiingi tergeý bastady», - dep jazylǵan basqarmanyń resmi málimetinde.
Sondai-aq, vedomstvo prokýratýra men sanitarlyq-epidemiologiialyq baqylaý departamentine atalǵan balabaqshanyń qyzmetin tekserý qajettigi týraly hat joldaǵan.
Bul másele QR Bilim jáne ǵylym ministrliginiń balalardyń quqyqtaryn qorǵaý komitetiniń baqylaýynda.
Qalalyq bilim basqarmasynyń deregi boiynsha, balabaqsha - jeke menshik uiym bolyp tabylady, memlekettik tapsyryspen jumys istemeidi.
Mektepke deiingi uiymnyń ákimshiligi basqarmaǵa jumysyn bastaǵany týraly málimet joldamaǵan.
Qazirgi tańda onda12 adam 60-tan astam balamen jumys isteidi.
