Foto: Ortkom
Astanada Qurmanǵazy atyndaǵy Qazaq ulttyq halyq aspaptar orkestriniń 90 jyldyǵyna arnalǵan mereitoilyq kontserti ótti. Bul týraly Ortalyq kommýnikatsiialar qyzmetinde ótken baspasóz otyrysynda uiymdastyrýshylar aitty dep habarlaidy Ult.kz.
"Eki bólimnen turatyn bul kesh — ulttyq ónerdiń tereń tarihy men búgingi zamanaýi tynysyn toǵystyrǵan aitýly mádeni shara boldy", - dep otyr Qurmanǵazy atyndaǵy Qazaq ulttyq halyq aspaptar orkestriniń direktory Medet Qýanyshev.
Kontsert Qazaqstan Respýblikasynyń Mádeniet jáne aqparat ministrliginiń qoldaýymen uiymdastyrylyp, kórermenderge dástúrli kúiler men álemdik klassikanyń úndesken erekshe baǵdarlama usynyldy.
Kontsert eki bólimnen turady: Birinshi bólim dástúrli kúishi-kompozitorlardyń (Qurmanǵazy, Dáýletkerei, Táttimbet, N. Tilendiev, Q. Ahmediiarov, T. Shámelov jáne t.b.) kúilerine arnalǵan akademiialyq kontsert. Bul bólim ulttyq mýzykanyń tereńdigin, bailyǵyn jáne tarihi mańyzyn pash etedi. Al ekinshi bólim zamanaýi baǵyttaǵy shyǵarmalar men álemdik klassikany qamtidy. Orkestrge laiyqtalǵan bul týyndylar ulttyq dástúr men qazirgi zamannyń úilesimdi úndestigin kórsetedi.
"Bul kontsert arqyly orkestr tarihi jáne mádeni sabaqtastyqty nasihattaýdy, ulttyq ónerdiń zamanaýi sahnada jańasha túrlenip, damyp kele jatqanyn kórsetýdi maqsat tutady", - deidi Medet Qýanyshev.
1934 jyly akademik Ahmet Jubanovtyń bastamasymen on bir adamnan quralǵan Qurmanǵazy atyndaǵy orkestr búginde 90 kásibi mýzykantty biriktirip, 5000-nan astam ulttyq jáne álemdik mýzykalyq shyǵarmalardy repertýaryna engizip otyr.
Aldaǵy ýaqytta orkestr gastroldik saparyn Shymkent qalasyndaǵy «Orkestrler sherýi» respýblikalyq festivalimen jalǵastyrady. Sonymen qatar, shymkenttik kórermenderge avtorlyq joba - «Orkestr túni» usynylmaq.
Ulttyq orkestr – ǵasyrǵa jýyq ýaqyt boiy ulttyq mýzyka mádenietiniń damýynda airyqsha ról atqaryp kele jatqan elimizdiń basty shyǵarmashylyq ujymdarynyń biri. Orkestr repertýary – san ǵasyrlyq saz muramyzdy búgingi býynmen qaýyshtyrýdyń jarqyn kórinisi.
Bul kesh – tyńdarman qaýymǵa ulttyq rýhty sezinýge, kúi óneriniń tereńdigin uǵynýǵa jáne qazaq mýzykasynyń ǵajaiyp álemine saiahat jasaýǵa múmkindik beredi.
