Roza Baǵlanova atyndaǵy «Qazaqkontsert» MAKU QR Mádeniet jáne aqparat ministrliginiń qoldaýymen Roza Baǵlanova atyndaǵy «Qazaqkontsert» memlekettik akademiialyq kontserttik uiymy elorda qonaqtary men turǵyndaryn «Kóshpendiler áýeni» II halyqaralyq etnikalyq mýzyka festivaline shaqyrady.
Jobanyń maqsaty - birtutas shyǵarmashylyq orta qurý, tarihy tereńge jaiylǵan óner, ejelgi salt-dástúr arqyly túrki halyqtarynyń birligi men rýhaniiatyn ulyqtaýǵa baǵyttalǵan túrki mádenietin dáripteý. Festival úzdik ónerpazdar tájiribe almasyp, urpaqtar sabaqtastyǵyn nasihattaityn alańǵa ainalmaq. Sonymen qatar, jas oryndaýshylardyń kórkemdik talǵamyn tárbieleýge jáne olardy úzdik mádeni qundylyqtarǵa baýlýǵa baǵyttalǵan.
Kontserttik baǵdarlamada kórermender folklorlyq dástúrlermen tyǵyz bailanysty, túrki áleminiń mýzykalyq murasyn jańa qyrynan tanytatyn oryndaýshylardyń ónerin tamashalaidy. Sondai-aq, dala áýenderiniń baiyrǵy úlgileri men halyq ánderiniń zamanaýi óńdelgen nusqalary, ulttyq aspaptarǵa arnalǵan týyndylar men oryndaýshylyqtyń tyń formalary usynylady.
Festivaldiń alǵashqy kúni sahnaǵa shyǵatyn sheteldik ónerpazdar: Resei Federatsiiasynan «Namǵar» toby (Býriatiia), Zakir Dúishenbek (Qyrǵyzstan) jáne Jánibek Piiazov (Qaraqalpaqstan). Sondai-aq, qazaqstandyq óner ujymdary men talantty oryndaýshylary da óz ónerlerin ortaǵa salady. Atap aitqanda, «Astana sazy» qazaq memlekettik folklorlyq ansambli, «Joshy» ansambli, «Satzhan Project» toby, Edil Qusaiynov, Qazybek Ádikei, Amanjol Nyǵmet, Sandjai Almishev jáne Aihat Qazihan.
Festivaldiń ekinshi kúni sahnaǵa shyǵatyn sheteldik ónerpazdar: Arslanbek Sýltanbekov (Túrkiia), «Zafar» toby (Ázerbaijan), Resei Federatsiiasynan Erkin Alekseev (Saha Respýblikasy) jáne Azat Bikchýrin (Bashqurtstan). Sondai-aq, «Qorqyt» etno-folklorlyq ansambli, «Túrkistan» kameralyq ansambli, Edil Qusaiynov jáne Saltanat Ersultan.
2023 jyly alǵash ret ótken «Kóshpendiler áýeni» halyqaralyq etnikalyq mýzyka festivaline Iakýtiia, Ózbekstan, Qyrǵyz Respýblikasy, Túrkiia jáne Majarstan elderiniń ónerpazdary qatysqan bolatyn.
