Astanada sóileý jáne psihikalyq damýy tejelgen oqýshy sabaqtan keiin qurdastarynyń soqqysyna ushyraǵan. Bul týraly balanyń anasy áleýmettik jelidegi paraqshasynda jazdy., dep habarlaidy ult.kz.
Áieldiń aitýynsha, jasóspirimdi sabaqtan shyqqan kezde segiz bala kútip turǵan. Olardyń biri artynan kelip, ony qylqyndyryp, keiin soqqyǵa jyqqan.
Al qalǵandary bolǵan oqiǵany syrttai baqylap, kúlip turǵan. Keibiri jaitty telefonǵa túsirip alǵan, tipti basqa oqýshylardyń arasha túsýine kedergi jasaǵan.
— Býlling tek uryp-soǵýmen shektelmeidi. Balany qorlap jatqanda únsiz turǵandar, aitaqtaǵandar men videoǵa túsirgender de jaýapty, — dep jazdy anasy.
Oqiǵaǵa qatysty Astana qalalyq politsiia departamenti pikir bildirdi.
Vedomstvo málimetinshe, janjalǵa qatysqan barlyq jasóspirim anyqtalyp, politsiiaǵa jetkizilgen. Olar profilaktikalyq esepke qoiyldy.
Sondai-aq kámeletke tolmaǵandardy tárbieleý mindetin tiisinshe oryndamaǵany úshin olardyń zańdy ókilderi ákimshilik jaýapkershilikke tartylǵan.
Politsiianyń habarlaýynsha, mektep ákimshiligi men ata-analardyń qatysýymen profilaktikalyq keńes ótkizilip, býllingtiń aldyn alý, oqýshylardyń minez-qulqyn baqylaýdy kúsheitý jáne ata-analardyń jaýapkershiligin arttyrý máseleleri qaralǵan.
