Astanada «Energetikalyq jáne kommýnaldyq sektorlardy jańǵyrtý» (EKSJ) ulttyq jobasy aiasynda óndiristi damytý jáne otandyq ónim úlesin arttyrý máselelerine arnalǵan seminar-keńes ótti, dep habarlaidy ult.kz Ónerkásip jáne qurylys ministrligine silteme jasap.
Is-sharaǵa tabiǵi monopoliia sýbektileri, memlekettik organdar, salalyq uiymdar men qazaqstandyq óndiris oryndarynyń ókilderi qatysty.
Seminardyń saltanatty ashylýynda Qazaqstan Respýblikasy Ónerkásip jáne qurylys vitse-ministri Oljas Saparbekov quttyqtaý sóz sóiledi. Ol óz sózinde EKSJ ulttyq jobasy Úkimet tarapynan tek infraqurylymdy jańǵyrtý baǵdarlamasy retinde ǵana emes, sonymen qatar otandyq óndiristi damytýǵa jáne energetika men turǵyn úi-kommýnaldyq sharýashylyq salalary úshin ornyqty ónerkásiptik negiz qalyptastyrýǵa baǵyttalǵan mańyzdy tetik retinde qarastyrylatynyn atap ótti.
«EKSJ ulttyq jobasyn iske asyrý aiasynda otandyq taýar óndirýshilerdi qoldaýdyń qajetti tetikteri qalyptastyryldy. Biz qazaqstandyq biznes jańǵyrtý jobalaryna belsendi qatysyp, lokalizatsiialaý deńgeiin, ónim sapasy men tehnologiialyq quzyretterin odan ári arttyrady dep senemiz», – dedi vitse-ministr.
Sondai-aq ol ulttyq jobanyń negizgi baǵyttarynyń biri – el ishindegi qundylyqty damytý jáne qazaqstandyq taýar óndirýshilerdi qoldaý ekenin aitty. Oljas Saparbekovtiń aitýynsha, búginde Qazaqstanda mashina jasaý, metall óńdeý, qurylys materialdaryn óndirý, himiia jáne munai-gaz himiiasy salalarynda sapasy jaǵynan sheteldik ónimderden kem túspeitin eleýli óndiristik áleýet qalyptasqan.
Vitse-ministrdiń aitýynsha, EKSJ ulttyq jobasy aiasynda jalpy quny 2,2 trln teńgeni quraityn 2700-den astam taýar túrine suranys qalyptasady dep kútilýde.
Seminar barysynda ulttyq jobanyń normativtik jáne institýtsionaldyq bazasy otandyq óndirýshilerdi qoldaý basymdyǵyna negizdelip qurylǵany atap ótildi. Atap aitqanda, qazaqstandyq kásiporyndardyń EKSJ jobalaryna qatysýyn keńeitý maqsatynda satyp alý tetikteri, ofteik-kelisimsharttar jáne jobalardy tsifrlyq súiemeldeý quraldary qarastyrylǵan.
Seminar aiasynda qatysýshylar otandyq ónimdi jobalyq-smetalyq qujattamaǵa engizý, standarttaý, óndiristik kooperatsiiany damytý, tarif qalyptastyrý máselelerin, sondai-aq qazaqstandyq óndirýshilerdiń atalǵan jobalarǵa qatysý múmkindikterin keńeitý tetikterin talqylady.
Is-shara baǵdarlamasyna jańa óndiristerdi lokalizatsiialaý, óndirýshilerge qoiylatyn talaptar, standarttardy engizý jáne el ishindegi óndiristik kooperatsiiany damytý máselelerine arnalǵan birneshe taqyryptyq pikirtalas alańdary engizildi. Sonymen qatar óndiristik tapshylyq kartasyn qalyptastyrý, zamanaýi tehnologiialardy engizý jáne zerthanalyq sapa baqylaý júiesin jetildirý máselelerine erekshe nazar aýdaryldy.
Iskerlik baǵdarlamadan bólek, seminar alańynda qazaqstandyq óndirýshiler ónimderiniń kórme aimaǵy jáne EKSJ jobalary boiynsha tikelei kelissózder, konsýltatsiialar men ótinimderdi talqylaýǵa arnalǵan B2B alańy jumys istedi.
Is-shara aiasynda naryq qatysýshylary arasynda birlesken qyzmet jáne yntymaqtastyq týraly kelisimderge qol qoiý josparlanyp otyr.
Uiymdastyrýshylar mundai salalyq alańdar memleket, biznes jáne salalyq uiymdar arasyndaǵy syndarly dialogty damytýǵa, sondai-aq Qazaqstandaǵy lokalizatsiialaý deńgeii men ónerkásiptik kooperatsiiany arttyrýǵa yqpal etetinin atap ótti.
