Foto: primeminister.kz
Astanada eks-sheneýnik Erjan Babaqumarovtyń ólimine qatysty qylmystyq is boiynsha sot úkimi shyqty. Bul týraly qalalyq sottyń baspasóz qyzmeti habarlady.
Astana qalasynyń qylmystyq ister jónindegi mamandandyrylǵan aýdanaralyq soty aiyptalýshyny kináli dep tanyp, ony 11 jyl merzimge bas bostandyǵynan aiyrýǵa úkim shyǵardy.
Sot sheshimi 2026 jylǵy 20 aqpanda qabyldanyp, zańdy kúshine engen. Alaida negizgi sot talqylaýy jabyq rejimde ótkendikten, is materialdary men mán-jaiyna qatysty tolyq aqparat jariia etilmedi.
Eske salaiyq, qaiǵyly oqiǵa 2025 jylǵy 30 qazanǵa qaraǵan túni bolǵan. Sol túni Erjan Babaqumarov tanystarynyń ortasynda bolǵany aitylady. Kezdesý barysynda týyndaǵan janjal sońy tóbeleske ulasyp, eks-sheneýnik aýyr jaraqat alyp, kóz jumǵan. Bul jaǵdai qoǵamda keń rezonans týǵyzǵan edi.
Erjan Babaqumarov ár jyldary memlekettik qyzmettiń túrli salasynda eńbek etti. Ol Qazaqstan damý institýtynyń Saiasi zertteýler ortalyǵynda, Almaty qalasy ákiminiń apparatynda, QR Prezidenti Ákimshiliginde, Mádeniet jáne aqparat ministrliginde, Premer-Ministr Keńsesinde, sondai-aq Prezident janyndaǵy Ortalyq kommýnikatsiialar qyzmetinde qyzmet atqarǵan.
2019 jyldyń sáýiri men shildesi aralyǵynda QR Prezidentiniń keńesshisi bolǵan. Keiin 2019 jylǵy shildeden 2022 jylǵy aqpanǵa deiin Almaty qalasy ákiminiń orynbasary qyzmetin atqardy. Al 2022 jyly Prezident janyndaǵy Ortalyq kommýnikatsiialar qyzmetiniń direktory bolyp taǵaiyndalǵan.
Jabyq ótken sot protsesi men shekteýli aqparat qoǵamda bul iske qatysty suraqtardyń áli de kóp ekenin ańǵartady.
