Qazaqkontsertte «ASTANA MUSICAL» memlekettik miýzikl teatry «Dostar serti» miýzikly ótti.
Jyldar boiy kórermenniń joǵary baǵasyna ie bolǵan miýzikl teatrdyń negizgi qoiylymdarynyń birine ainaldy. Miýzikldiń premerasy 2016 jyly 16 qazanda ótken bolatyn.
Atalmysh miýziklda qazaq mýzykasynyń «Altyn qoryna» engen Sh.Qaldaiaqov, E.Hasanǵaliev jáne «Dos-Muqasan» tobynyń ánderi arqaý boldy. Sonymen qatar, álemdik mýzykanyń jaryq juldyzy «The Beatles» tobynyń repertýaryndaǵy shyǵarmalar jáne jańa stilistikalyq baǵytta jazylǵan kompozitsiialar oryndaldy.
Miýzikl jelisi 1960-70-jyldar kezeńinde órbidi, elimizdiń ár óńirinen arman qýyp, konservatoriiaǵa oqýǵa kelgen jáne bir qalada toǵysqan tórt abitýrient jigittiń basynan keshken qyzyqty oqiǵalary, jalyndaǵan jastyq shaqtary, adal dostyq pen naǵyz mahabbat hikaialary baiandalady.
Bul qoiylym naǵyz dostyqty beineleidi. Olar alǵashqy sezimderin, ómirdiń jańa synaqtaryn birge ótkeredi. Biri – romantikaǵa berilgen, ekinshisi – óz maqsatyna umtylǵan, úshinshisi – dostarynyń kóńilin kóterýdi unatatyn, al tórtinshisi – salmaqty ári oily. Olardyń árqaisysynyń ómiri men arman-maqsattary tek dostyqtyń arqasynda júzege asady. Jigitter birge qýanyp, birge muńaiyp, qiyndyqtarǵa qarsy turady. Dostyqtyń shynaiy qýaty – árbir synaqta, qýanysh pen kúiinishte.
Miýzikldyń ár sáti jastardyń ómir jolynda kezdesetin múmkindikter men tosyn syilarǵa toly. Olar tek dos emes, bir-biriniń armandaryn júzege asyrýǵa kómektesetin, shynaiy baýyrǵa ainalady. «Dostar serti» miýzikly jastyq shaǵyńyzdyń ádemi sátteri, qiyndyǵy jáne estelikterin kórsetip, umytylmas áserge bóleidi.
Libretto avtory – Qazaqstannyń eńbek sińirgen qairatkeri Baqyt Qaiyrbekov, aýdarmashy, dramatýrg – Ánnas Baǵdat. Qoiylymnyń mýzykasyn jazǵan tanymal dirijer, Qazaqstannyń eńbek sińirgen qairatkeri – Artýr Orenbýrgskii. Miýzikl rejisseri – «Astana Musical» memlekettik miýzikl teatrynyń kórkemdik jetekshisi Eslám Nurtazin.
Basty rólde oinaityn ártister: Marat - Aqjol Ómirzaqov, Marat (qart)-Daniiar Týranov, Aidos - Ádilet Abdýkadirov, Qairat-Saiat Makýlbaev, Jumatai - Ashat Baitleý, Ásem-Arailym Qusainova.
