Aqmola oblysynyń politseileri Kókshetaý turǵynynan 10 mln teńgeden astam aqsha alyp ketken alaiaqtardyń kýrerin Astanadan ustady, dep habarlaidy ult.kz.
Oqiǵa 11 qyrkúiekte bolǵan. Alaiaqtar 59 jastaǵy áielge telefon soǵyp, ózderin quqyq qorǵaý organdarynyń qyzmetkerleri retinde tanystyrǵan. Olar áieldi túrli sebeppen qorqytyp, aqshasyn «qaýipsiz jerge» aýdarýǵa kóndirgen.
Psihologiialyq qysymǵa túsken áiel barlyq jinaǵyn jinap, kelgen kýrerge 10 mln teńgeden astam aqshany paketpen bergen. Er adam ketip qalǵannan keiin ǵana onyń alaiaqtardyń qurbany bolǵanyn túsingen áiel politsiiaǵa habarlasqan.
Jedel izdestirý barysynda politseiler aqshany alyp ketken adamnyń jeke basyn anyqtaǵan. Onyń Astanada turatyny belgili bolyp, Kókshetaýdan jedel top elordaǵa attanǵan.
Kýrerdi izdeý jumystary tórt saǵattan astam ýaqytqa sozylǵan. Nátijesinde kúdikti ustalyp, onyń janynan jábirlenýshige tiesili aqsha tolyq kólemde tabylǵan.
«Qýanyshymyzǵa orai, qylmysker alǵan aqshanyń barlyǵyn aýdaryp úlgermegen. Ustalǵan azamat telefon arqyly qońyraý shalyp, Kókshetaýǵa baryp, aqshasy bar paketti alyp ketý týraly tapsyrma alǵanyn aitty», – dedi politsiia.
Qazir kúdiktige qatysty tergeý amaldary júrgizilip jatyr. Politseiler onyń osyǵan uqsas basqa da qylmystarǵa qatysy bar-joǵyn tekserýde.
Aqmola oblysynyń politsiia departamenti azamattarǵa memlekettik organdar men quqyq qorǵaý qurylymdarynyń qyzmetkerleri eshqashan «tekserý» nemese «aqshany saqtaý» úshin aqsha berýdi ne aýdarýdy talap etpeitinin eske saldy.
Mundai qońyraý túsken jaǵdaida áńgimeni birden toqtatyp, politsiiaǵa habarlasý qajet.
