Elordada memlekettik-jekeshelik áriptestik jobasy aiasynda salynýy tiis 4 balabaqsha qurylysynyń bastalmaýyna polshalyq investordyń ómirden ozýy sebep bolýy múmkin. Bul týraly Nur-Sultan qalalyq Bilim basqarmasy basshysynyń mindetin atqarýshy Dýlat Shoǵanbai aitty, dep habarlaidy QazAqparat.
«Bizde taǵy bir kúrdeli másele bar. Qalǵan 4 balabaqsha boiynsha halyqaralyq, Polshadan investor bar. Biz qala basshylyǵynyń ruqsatymen Polshaǵa habarlasyp, kelisimshartqa qaraýymyz kerek. Nege? Sebebi 2 jyl ótti, ol jaqtan esh habar joq. Birde-bir kirpishi qalanbaǵan. Halyqaralyq investor 240 oryndyq 4 nysan salý kerek bolatyn. 2017 jyldan beri úsh jyl ýaqyt ótti. Kelisimshart boiynsha 2019 jyly qurylysy bitip, paidalanýǵa berilýi tiis bolatyn. Bizde investor qaitys boldy degen málimet bar. Ol sheteldik bolǵannan keiin esh habaryn ala almai otyrmyz», - dedi ol elorda máslihatynyń áleýmettik-mádeni damý máseleleri jónindegi turaqty komissiiasynyń otyrysynda.
Osy rette Nur-Sultan qalalyq máslihatynyń hatshysy Erlan Kanalimov bul problemany sheshýdiń birneshe jolyn atady.
«Bizde, ákimdikte halyqaralyq bólim bar. «Atameken» ulttyq kásipkerlik palatasy bar. Olardyń kúshi jetpei jatsa, Syrtqy ister ministrligin tartý kerek. Solar arqyly taǵy bir suranys jibereiik. Polshada Elshiligimiz de jumys isteidi. Ómir, túsinemiz. Eger investor qaitys bolsa, jobany iske asyratyn izbasarlary qalmasa bul jobalardy basqa investorlarǵa bereiik. Qolymyzda tur ǵoi»,- dedi ol.
