Qaiǵyly oqiǵa kezinde balanyń anasy úide bolǵan, dep habarlaidy QazAqparat agenttigi Nur-Sultan qalasy politsiia departamentiniń baspasóz qyzmetine silteme jasap.
«5 shilde kúni keshki saǵat 21:57-de kópqabatty turǵyn úidiń 13-qabatynan 3 jasar qyz dúkenniń kúnqaǵaryna (kozyrek) qulady. Alǵan jaraqattan sábi oqiǵa ornynda mert boldy. Oqys oqiǵa kezinde balanyń anasy úide bolǵan», - delingen qalalyq politsiia departamenti taratqan habarlamada.
Elordanyń iývenaldy politsiia inspektorlary balalardyń kópqabatty úilerdiń terezesinen qulap ketý faktilerine jol bermeý maqsatynda turǵyndar arasynda túsindirý jáne profilaktikalyq jumystardy jii ótkizip turady.
«Jazataiym oqiǵalardyń deni ata-analardyń balalardyń qaýipsizdigine nemquraily qaraýymen bailanysty. Bala eresekterdiń nazarynan tys qalyp, tereze ashyq qalǵan jaǵdaida qulaý qaýpi joǵary», - deidi vedomstvodan.
Osyǵan orai Nur-sultan qalasynyń politsiia departamenti ata-analarǵa balalardy terezeden qulaýdan qorǵaýǵa qatysty usynady:
- Bala úide bolǵan kezde terezelerdi jaýyp júrińiz. Siz balanyń qasyndamyn dep oilaisyz, degenmen balany birneshe sekýnd nazardan tys qaldyrý qaiǵyly jaǵdaimen aiaqtalýy múmkin;
– Eshqashan moskit torlaryna senbeńiz, balalar oǵan súienip, qorǵaý quralymen birge qulap ketedi;
- Bala terezeni óz betinshe asha almaýy úshin terezelerge arnaiy qorǵaý júielerin (bekitkishter, blokiratorlar) ornatyńyz;
- Úidegi jihazdy terezeden aýlaq ustańyz. Bul balanyń tereze aldyna kezdeisoq tap bolýyna jol bermeidi.
