Foto: ashyq derekkóz
Astanada kóppáterli turǵyn úi qurylysyna bólingen biýdjet qarjysyn talan-tarajǵa salǵan «Dorstroitrest» JShS basshysyna sot úkimi shyqty, dep habarlaidy Ult.kz.
Qarjy monitoringi agenttiginiń (QMA) Astana qalasy boiynsha departamenti júrgizgen tergeý nátijesinde, «Samruk-Kazyna Construction» AQ men «Dorstroitrest» JShS arasynda jasalǵan kelisim aiasynda merdigerge 2,6 mlrd teńge avans aýdarylǵany anyqtaldy.
Alaida qurylys jumystary talapqa sai júrgizilmei, merziminde aiaqtalmaǵan. Al bólingen qarajattyń bir bóligi ózge qaryzdardy óteýge jáne avtokólik satyp alýǵa jumsalǵan. Budan bólek, 650 mln teńge jalǵan kelisimder arqyly affilirlengen kompaniialarǵa aýdarylyp, qolma-qol aqshaǵa ainaldyrylǵan.
Sot sheshimimen kompaniia basshysy Nýrabaev kináli dep tanylyp, 7 jylǵa bas bostandyǵynan aiyryldy. Sonymen qatar jalpy quny 131 mln teńgege baǵalanǵan múlik memleket kirisine tárkilendi.
Aita keteiik, «Samruk-Kazyna Construction» AQ-nyń burynǵy basqarýshy direktory halyqaralyq izdeýde.
