Astanada bilim jáne ǵylym eks-vitse-ministriniń soty bastaldy. Saiat Shaiahmetovke 1,5 milliard teńgeni iemdendi jáne jaratty degen kúdik kelip otyr, - dep habarlaidy kaz.tengrinews.kz tilshisi.
Qosymsha tergeý júrgizilgennen keiin Astanada burynǵy vitse-ministrdiń soty bastalady. Sottalýshylar qatarynda onymen birge "QR salynyp jatqan bilim jáne ǵylym nysandary direktsiiasy" JShS bas direktory Aleksandr Pak bar. Olarǵa QR bilim jáne ǵylym ministriginiń qarajatyn jymqyrdy jáne jaratty degen kúdik kelip otyr. Bul qarajat 2011 jyly Óskemendegi Mashina qurylysshylarynyń daiyndyǵy jáne qaita daiyndaý ortalyǵynyń qurylysyna bólingen.
Sot tyńdaýy barysynda eks-vitse-ministrge memlekettik qorǵaýshy retinde elordalyq advokattar alqasynan Sabina Shapenova taǵaiyndalǵan. Alaida, qylmystyq istiń basty figýrantynyń sózinshe, advokatpen tanysýǵa múmkindigi bolmaǵan.
"Jańa qorǵaýshy tabýyma ýaqyt berýdi suraimyn. Men burynǵy qorǵaýshym Bisekeevten bas tarttym, sebebi tergeý barysynda onymen kezdesip, áńgimelese almadym. Qazirgi ýaqytta bekitilgen Shapenovaǵa qatysty narazylyǵym joq, sebebi men ony tanymaimyn, sóilespedim de. Qorǵaýshy izdeýime ýaqyt berýińizdi suraimyn. Óz tarapymnan buǵan az ýaqyt qajet bolatynyn aita alamyn", - dedi Saiat Shaiahmetov.
Alaida Astananyń №2 Almaty aýdandyq sotynyń osy is boiynsha tóraǵalyq etetin sýdiasy Aijan Kúlbaeva bul ótinishti qanaǵattandyrmady.
Eske salaiyq, bilim jáne ǵylym eks-vitse-ministri Saiat Shaiahmetovke jáne birqatar laýazymdy tulǵaǵa qatysty sot tyńdaýy 2014 jyldyń jazynda bastalǵan. Alaida eki ai ótkennen keiin is qosymsha tergeýge jiberilgen. Sol ýaqytta sot Shaiahmetovtyń kinásiniń dálelderine kúmán keltirgen edi.
