Astanada 3 shilde kúni Qosshyǵululy 10 mekenjaiy boiynsha ornalasqan úidiń 10 qabatynan eki bala qulap kete jazdady. Kýáger bolǵan oqiǵany dúiim jurttyń kózinshe jaiyp saldy, dep jazady QazAqparat.
«Oqiǵaǵa kýá bolǵan barlyǵymyz qatty qoryqtyq. Qazir esime alsam, júregim jarylyp kete jazdaidy. Terezeniń aldyndaǵy taqtaishada turǵan balalardy joldyń boiymen ótip bara jatqan «Gazeldiń» júrgizýshisi baiqap, birden dabyl qaǵa bastady», - dedi kýáger qyz.
Ol esimin atamaýdy ótindi.
Qyzdyń aitýynsha, balalardyń jastary shamamen - 4-5-te. Shalqasynan ashyq jatqan terezeniń aldyndaǵy taqtaishada oinap júrgen. Tómende turǵan adamdar sábilerdiń biri ekinshisin arttan iterip jiberedi dep qoryqqan.
«Barlyǵymyz daýsymyzdy barynsha qatty shyǵaryp, olardan terezeden túsip, úige kirýlerin ótindik. Qatty aiǵailaǵanym sonshalyq, áli kúnge daýsymdy qalpyna keltire almai júrmin. Alaida, balalar bizdiń shý shyǵarǵanymyzǵa odan saiyn qyzyǵyp, tómenge qarai berdi», - dep kýáger qyz oqiǵa ornyna qutqarýshylar kelgenge deiingi jaǵdaidy eske alady.
Sondai-aq, kýáger kez kelgen balanyń terezeden qulaýyna sebep bolatyn biik qabatty úilerdegi aqaýlardy atady.
«Bul jerlerde adamdardyń basym kópshiligi páter jaldap turady. Al jalǵa berýshiler terezelerge tor ornatýdy oilamaidy, sebebi ol da - shyǵyn», - dedi oqiǵa kýágeri.
Eske salaiyq, qalalyq Tótenshe jaǵdailar departamentiniń qyzmetkerleri 10 qabattyń terezesiniń aldyndaǵy taqtaishada oinap júrgen eki balany qutqaryp, aman alyp qalǵan bolatyn. Qutqarýshylar kelgenge deiin kórshiler balalardy qolda bar quraldar arqyly ustap turǵan.
