استانادا 3 شٸلدە كٷنٸ قوسشىعۇلۇلى 10 مەكەنجايى بويىنشا ورنالاسقان ٷيدٸڭ 10 قاباتىنان ەكٸ بالا قۇلاپ كەتە جازدادى. كۋەگەر بولعان وقيعانى دٷيٸم جۇرتتىڭ كٶزٸنشە جايىپ سالدى, دەپ جازادى قازاقپارات.
«وقيعاعا كۋە بولعان بارلىعىمىز قاتتى قورىقتىق. قازٸر ەسٸمە السام, جٷرەگٸم جارىلىپ كەتە جازدايدى. تەرەزەنٸڭ الدىنداعى تاقتايشادا تۇرعان بالالاردى جولدىڭ بويىمەن ٶتٸپ بارا جاتقان «گازەلدٸڭ» جٷرگٸزۋشٸسٸ بايقاپ, بٸردەن دابىل قاعا باستادى», - دەدٸ كۋەگەر قىز.
ول ەسٸمٸن اتاماۋدى ٶتٸندٸ.
قىزدىڭ ايتۋىنشا, بالالاردىڭ جاستارى شامامەن - 4-5-تە. شالقاسىنان اشىق جاتقان تەرەزەنٸڭ الدىنداعى تاقتايشادا ويناپ جٷرگەن. تٶمەندە تۇرعان ادامدار سەبيلەردٸڭ بٸرٸ ەكٸنشٸسٸن ارتتان يتەرٸپ جٸبەرەدٸ دەپ قورىققان.
«بارلىعىمىز داۋسىمىزدى بارىنشا قاتتى شىعارىپ, ولاردان تەرەزەدەن تٷسٸپ, ٷيگە كٸرۋلەرٸن ٶتٸندٸك. قاتتى ايعايلاعانىم سونشالىق, ەلٸ كٷنگە داۋسىمدى قالپىنا كەلتٸرە الماي جٷرمٸن. الايدا, بالالار بٸزدٸڭ شۋ شىعارعانىمىزعا ودان سايىن قىزىعىپ, تٶمەنگە قاراي بەردٸ», - دەپ كۋەگەر قىز وقيعا ورنىنا قۇتقارۋشىلار كەلگەنگە دەيٸنگٸ جاعدايدى ەسكە الادى.
سونداي-اق, كۋەگەر كەز كەلگەن بالانىڭ تەرەزەدەن قۇلاۋىنا سەبەپ بولاتىن بيٸك قاباتتى ٷيلەردەگٸ اقاۋلاردى اتادى.
«بۇل جەرلەردە ادامداردىڭ باسىم كٶپشٸلٸگٸ پەتەر جالداپ تۇرادى. ال جالعا بەرۋشٸلەر تەرەزەلەرگە تور ورناتۋدى ويلامايدى, سەبەبٸ ول دا - شىعىن», - دەدٸ وقيعا كۋەگەرٸ.
ەسكە سالايىق, قالالىق تٶتەنشە جاعدايلار دەپارتامەنتٸنٸڭ قىزمەتكەرلەرٸ 10 قاباتتىڭ تەرەزەسٸنٸڭ الدىنداعى تاقتايشادا ويناپ جٷرگەن ەكٸ بالانى قۇتقارىپ, امان الىپ قالعان بولاتىن. قۇتقارۋشىلار كەلگەنگە دەيٸن كٶرشٸلەر بالالاردى قولدا بار قۇرالدار ارقىلى ۇستاپ تۇرعان.
