Nur-Sultandaǵy kólik keptelisi máselesin sheshý úshin 2 kópir salý josparlanyp otyr. Bul týraly qalalyq kólik jáne jol-kólik infraqurylymyn damytý basqarmasynyń basshysy Jansultan Saparbaev málim etti, dep habarlaidy QazAqparat.
«Qalada kólik keptelisi áli de ózekti. Ásirese, Máńgilik el dańǵyly boiynda, atap aitqanda Ministrlikter úii men Ulttyq bank aralyǵynda. Buryn jarty saǵattap tursaq, qazir 1,5 saǵatqa deiin sozylady. Máńgilik el dańǵylymen qatar ornalasqan Á.Bókeihanov kóshesinde de jaǵdai máz emes, jóndeý kerek. Osy máseleler qalai sheshilmek?» - dep qalalyq máslihattyń depýtaty Nurdáýlet Orazhanov saýal joldaǵan.
Depýtat saýalyna qalalyq kólik jáne jol-kólik infraqurylymyn damytý basqarmasynyń basshysy Jansultan Saparbaev jaýap berdi.
«Jalpy sol jaǵalaýdaǵy keptelis máselesin sheshý úshin qosymsha eki kópir salý qajet. Alǵashqysy – Táýelsizdik, ekinshi kópir – Uly dala dańǵylynda. Búginde Táýelsizdik dańǵylyndaǵy kópir qurylysynyń montajdaý jumysy bastaldy. Respýblikalyq biýdjetten qarjy kútip otyrmyz. Kópir qurylysy úshin 7 mlrd teńgege jýyq qarajat kerek. Uly dala boiynda salynatyn kópir boiynsha merdiger kompaniia anyqtaldy. Ol jerde jumys búgin bastalady. Kópirdi qala kúnine orai qoldanysqa berýge tyrysamyz. 2 kópir iske qosylǵannan keiin Máńgilik el, Turan, Qabanbai batyr dańǵyldarynyń boiyndaǵy keptelis rettelýi tiis», - deidi ol.
Odan bólek, basqarma basshysynyń aitýynsha, Buqar jyraý kóshesindegi byltyr bastalǵan kópir biyl paidalanýǵa berilmek.
