QR Syrtqy ister ministri Qairat Ábdirahmanov Siriia boiynsha Astana protsesi aiasyndaǵy joǵary deńgeidegi 5-shi halyqaralyq kezdesýdiń qorytysyndyn shyǵardy, dep habarlaidy QazAqparat.
«Osy jyldyń basynda Memleket basshysy Nursultan Nazarbaevtyń qoldaýymen jáne tikelei qatysýmen bastalǵan protsess úlken jetistikke jetti. Astanada ótken kezdesýlerdiń nátijesinde Siriiadaǵy zorlyq-zombylyq aitarlyqtai tómendedi. Halyqtyń beibit ómirin qalpyna keltirý úshin kóptegen is atqaryldy. Oǵan Siriiadaǵy soǵys is-qimyldaryn toqtatý rejiminiń kepilger elderiniń kúsh-jigerimen qatar, Siriia Úkimeti men qarýly oppozitsiianyń janjaldy beibit jolmen sheshýge umytylysy, sonymen qatar BUU tarabynan udaiy qoldaý septigin tigizdi. Qazaqstan kelissózderge óz alańyn usyna otyryp, Siriia halqynyń qaiǵy-qasiretin jeńildetýge jáne olardyń beibit ómirge oralý umtylysyna kómek kórsetý arqyly zor úles qosty. Osyǵan bailanysty elimiz halyqaralyq qaýipsizdik pen turaqtylyqty nyǵaitýǵa baǵyttalǵan kúsh-jigerge járdem kórsetýin jalǵastyra beredi. Bizdiń elimizdiń saiasaty búkil álemdegi dialogty, ózara túsinistik pen beibitshiliktiń turaqtylyǵyn nyǵaitýǵa baǵyttalǵan. Osyǵan orai Qazaqstan atalǵan daǵdarysty saiasi retteýge qol jetkizý úshin beibit saiasatyn jalǵastyra beredi. Múddeli taraptar arasyndaǵy kelissózder úshin tuǵyrnama usynatyn bolady», - dedi Qairat Ábdirahmanov.
Onyń aitýynsha, Siriia boiynsha Astana protsesi aiasyndaǵy búgingi joǵary deńgeidegi 5-shi halyqaralyq kezdesý Siriiadaǵy soǵysty toqtatý rejimin nyǵaitýǵa baǵyttalǵan oń nátijelermen aiaqtaldy. Kóptegen másele talqylanyp, taraptar arasynda naqty ýaǵdalastyqtarǵa qol jetkizildi jáne aldaǵy ýaqyttaǵy kelissózderdiń jospary qaraldy.
«Biz siriialyq janjaldyń áskeri sheshimi joq ekendigine árkez sendik. Sondyqtan dialog - bul beibitshiliktiń jalǵyz joly ǵana. Áskeri sheshim siriia halqyna munan da zor qasiret ákelip, óńirlik jáne halyqaralyq taraptar arasyndaǵy jańa qarama-qaishylyqtardy týyndatady», - dedi Qazaqstan Syrtqy ister ministri.
Sonymen qatar ol búgin Astana protsesine qatysýshylar Siriia jerinde beibitshilik pen turaqtylyq ornatýǵa taǵy da bir mańyzdy qadam jasaǵandyǵyn basa aitty.
