Búgin elordada Astana formatyndaǵy Siriia boiynsha 16-shy halyqaralyq kezdesý aiaqtaldy. Qorytyndysynda kelissózge qatysýshylar birlesken málimdeme qabyldady, dep habarlaidy QazAqparat.
Astana formatyndaǵy kelissózdiń kepilger elderi Iran Islam Respýblikasy, Resei Federatsiiasy jáne Túrkiia Respýblikasynyń birlesken málimdemesinde Siriia Arab Respýblikasynyń egemendigin, táýelsizdigin birligi men aýmaqtyq tutastyǵyn jaqtaityndyqtary atap ótilgen. Sonymen qatar Siriianyń ár qiyrynda lańkestik áreketterdiń arta túsýine, onyń saldarynan beibit turǵyndar arasynda qurbandardyń kóbeiýine alańdaýshylyq tanytyp, IGIL, Djabhat An-Nýsra/Heiat Tahrir Ash-Sham», buǵan qosa Ál-Kaidamen bailanysty bar uiymdardy tolyqtai joiý baǵytynda yntymaqtastyqty jalǵastyrý ýaǵdalastyǵyna qol jetkizilgendigine basa nazar aýdarylǵan.
«Halyqaralyq quqyqty, halyqaralyq gýmanitarlyq quqyqty buzatyn, Siriianyń jáne kórshiles elderdiń egemendigine nuqsan keltiretin, óńirdegi turaqtylyq pen qaýipsizdikke qater tóndiretin Izraildiń Siriiaǵa áskeri shabýylynyń jalǵasýyn aiyptadyq jáne olardy toqtatýǵa shaqyrdyq. Siriia qaqtyǵysynyń áskeri sheshimi joq ekendigine nyq senim bildirdik», - delingen birlesken málimdemede.
