Qazaqstan Soltústik Koreianyń sýtegi bombasyn synaǵanyn taǵy da aiyptap, Pheniandy iadrolyq piǵylynan bas tartýǵa jáne kóp jaqty kelissózge qaita oralýǵa shaqyrdy. Bul jaiynda Qazaqstan syrtqy ister ministrliginiń "Soltústik Koreianyń iadrolyq synaǵyna qatysty" jasaǵan málimdemesinde aitylady.
3 qyrkúiekte Phenian qurlyqaralyq ballistikalyq zymyranǵa ornatýǵa bolatyn sýtegi bombasyn synaǵanyn habarlaǵan. AQSh-tyń BUU-daǵy elshisi Nikki Heili 4 qyrkúiekte BUU Qaýipsizdik keńesiniń shuǵyl jiynynda sóilep, Soltústik Koreiaǵa qarsy tezirek qatań sharalar qabyldaýǵa shaqyrdy.
"Qazaqstan Soltústik Koreianyń BUU Qaýipsizdik keńesiniń qararlaryn buzyp mundai áreketter jasaýy orynsyz ekenin jáne ony aiyptaitynyn málimdeidi. Qazaqstan Soltústik Koreia basshylyǵynyń bul isi álemdik qaýymdastyqtyń iadrolyq qarýdan bas tartý jáne ony taraptaý, qarýsyzdanýda jumsap jatqan kúsh-jigerine eleýli nuqsan keltirip, Korei túbegindegi jáne jalpy tutas aimaqtaǵy qaýipsizdik pen tynyshtyqqa qater tóndiredi dep biledi" delingen ministrik málimdemesinde.
