«Birjan – Sara» operasyna biyl 75 jyl. Osyǵan orai «Astana Opera» teatrynda M.Tólebaevtyń atalmysh mýzykalyq jaýhary usynylady. Dirijer – Qazaqstannyń eńbek sińirgen qairatkeri, qoiýshy dirijer Abzal Muhitdin, dep habarlaidy "Ult aqparat".
«Sózsiz, barsha mýzykalyq qaýymdastyq úshin bul eleýli oqiǵa, sebebi «Birjan – Sara» qazaq opera óneriniń asyl murasy bolyp tabylady. 17 aqpan kúni biz buǵan deiingi aýqymynan erekshelenetin rejisserlik nusqany oryndaimyz. Kompozitor Muqan Tólebaevtyń mýzykasy jaratylysynan óte jarqyn, ásem ári sazdy, onyń ózi vokalmen kásibi turǵydan ainalysqany belgili. «Birjan – Sara» operasynda sazger halyq aqynynyń mýzykalyq dáieksózderin paidalanǵan, «Aitpai» áni bas keiipker beinesiniń bastamasy bolyp tabylady», - dedi Abzal Muhitdin.
«Birjan – Sara» operasynyń premerasy 1946 jyly 7 qazanda Abai atyndaǵy teatrda ótti. Úsh jyldan soń opera avtorlary men oryndaýshylaryna Stalin syilyǵy berildi. 1958 jyly atalmysh spektakl Máskeýdegi Qazaqstannyń óneri men ádebietiniń on kúndigi kezinde kórsetildi. Shyǵarma shetelde tanymaldylyqqa ie boldy: Qajym Jumalievtiń librettosy túrik tiline beiimdelip aýdaryldy jáne 2013 jyly opera Samsýnda, sonymen qatar 2014 jyly Ystanbul, Býrsa, Eskishehir jáne Ankarada kórsetildi.
Esterińizge salar bolsaq, osy operamen 2013 jyly «Astana Opera» teatrynyń tusaýy kesilgen bolatyn. Ony Qazaqstannyń Tuńǵysh Prezidenti – Elbasy Nursultan Nazarbaev tamashalady. Kóp jyldar boiy qoiylym RF Halyq ártisi, QR Memlekettik syilyǵynyń laýreaty Iýrii Aleksandrovtyń qoiylymynda ótti. Sondai-aq 2014 jyly Sankt-Peterborda Mariin teatrynyń jańa sahnasynda usynyldy. Keiin 2018 jyly teatr Qazaqstan Respýblikasynyń eńbek sińirgen qairatkeri Ashat Maemirov pen keńesshi rejisser – Tatarstan Respýblikasy Memlekettik syilyǵynyń laýreaty Mihail Pandjavidzeniń mýzykalyq-sahnalyq redaktsiiasyn usyndy, onda qoiýshylar qazaq klassikasynyń stsenografiia stereotipteri men jekelegen keiipkerlerdiń minez-qulqyn qabyldaýdy buzyp-jarǵan jańasha oqylymyn usyndy.
17 aqpanda sahna tórine kórnekti ártister – Birjan – Beiimbet Tańaryqov, Sara – Qazaqstannyń eńbek sińirgen qairatkeri Bibigúl Januzaq, Janbota – Qazaqstannyń eńbek sińirgen qairatkeri Janat Shybyqbaev, Analyq – Qazaqstannyń eńbek sińirgen qairatkeri Dina Hamzina, Altynai – Mádina Islamova, Jienqul – Erjan Saipov jáne taǵy basqalary shyǵady.
Aita keteiik, osy kúni spektakl aiasynda «Astana Operanyń» Nur-Sultan qalasy ákimdigimen birlesken jańa jobasy - joǵary synyp oqýshylaryna arnalǵan «Teatr sabaǵy» ótedi.
