J.Massneniń mýzykasyna XX ǵasyrdyń kórnekti horeografy K.Makmillannyń qoiylymyndaǵy erekshe kórinisti «Manon» baleti «Astana Opera» teatrynda oryn alǵan premerasynan bastap-aq kórermenderdiń ystyq yqylasyna bólendi. Jaqynda, 30 qańtar kúni, qyzyqty da tartymdy spektakl teatrdyń Úlken zalynda kórermen nazaryna usynylady.
Qoiýshy baletmeister Karl Biornett óziniń suhbatynda áigili qoiylym týraly, qazaqstandyq ártistermen júrgizgen jumysy jaiynda baiandap berdi.
- Biornett myrza, trýppanyń mindeti – baletti tupnusqalyq kúide usyný. Osy tapsyrmany ártister qalai oryndaýda?
- Qazir qarqyndy daiyndyq jumystary júrgizilýde, solistermen usaq-túiek jaittardyń bárin qosa tolyqqandy jumys jasaýdamyz. «Manon» baletinde óte názik, biraq erekshe mańyzdy dúnieler kóp. «Astana Operanyń» balet trýppasy óte myqty. Buǵan deiin birge áriptes bolǵan adamdarmen jumys jasaý óte keremet, sebebi aramyzda meniń ótken jolǵy jumys barysymda oryn alǵan ózara túsinistigimiz bar. Basty partiialardy eki jyl buryn oryndaǵan solister ázirlep jatyr, qaita oralǵan kezimde birshama eseigen ári tájiribe jinaqtaǵan ártistermen kezdesý qandai keremet edi. Qazir olar óz rólderin oryndaýda biraz kemeldikke jetken. Ártister sahnaǵa qandai da bir partiiada birneshe ret shyqqan kezde, olar ony ón boiynan ótkizip, tájiribe jinaqtaidy jáne atqarylǵan jumystar negizinde shyn mánindegi tereń de mándi beineler jasaýy múmkin.
- «Astana Opera» sahnasynda ótetin «Manon» spektakliniń nusqasyna ózińizdiń kásibi baǵańyzdy berseńiz.
- Patrisiia Rýannmen birge osy spektakldiń qoiylymyn barsha álem boiynsha túrli trýppalarmen júzege asyryp kelemiz. Meniń jadymda Astanadaǵy premera týraly óte jaǵymdy estelikter saqtalǵan. Ser Kennet Makmillannyń ómirlik jary Debora Makmillan hanym da jumys nátijesine óte riza ári sondai qýanyshty boldy. Balet trýppasy ártisteriniń ónerine, sondai-aq dekoratsiialardy jańartý boiynsha júrgizilgen jumysqa da kóńili toldy. Bul múldem ońai dúnie emes, N.Georgiadistyń qoiylymy – óte kúrdeli ekenin atap ótken jón. Barlyq jumystar joǵary deńgeide júrgizildi, premera sondai keremet ótti. Sársenbi kúni spektakldi tamashalaǵan kezde de dál osyndai áserde bolatynyma senimdimin.
Aita keter bolsam, Debora hanym da balet trýppasynyń kórkemdik jetekshisi Altynai Asylmuratovanyń meni qoiylym boiynsha jumys jasaýǵa ári onyń bastapqy kúiin saqtap qalýǵa taǵy da shaqyrǵanyna óte qýanyshty boldy. Qoiylym joǵary deńgeide ótetinine senimdimin, bárine HH ǵasyrdaǵy horeografiia óneriniń osyndai jaýharynan lázzat alýǵa keńes beremin.
- Osy joly siz naǵyz qystyń ortasynda keldińiz, jergilikti klimatqa úirendińiz be? Elordalyq teatrda jumys jasaý sizge qolaily ma?
- Qazirgi tańda bári de jaqsy júrip jatyr. Bul meniń 2019 jyldaǵy alǵashqy jumysym. Aiazdy aýa raiyna qaramastan, tanys jerge qaita kelý unaidy. Esepteýimshe, sońǵy tórt jyl boiy qańtar aiyn Astana, Máskeý nemese Helsinki syndy sýyq jerlerde bastappyn. Osylaisha, jyldyń men úshin qatty qys mezgilinen bastalatynyna úirenip te kettim, buǵan qarsylyǵym da joq, sebebi qardy jaqsy kóremin. Astanada bul máseleniń qanshalyqty jolǵa qoiylǵandyǵyna tań qaldym: qar jaýysymen-aq ony tazalap úlgeredi. Bul jerde bári buǵan sap daiyn. Eýropada basqasha: qar jaýsa boldy, barlyq qozǵalys toqtaidy, ushaqtar da ushpaidy, avtobýstar da, poiyzdar da júrmeidi.
Eske salar bolsaq, Kennet Makmillan baletke arnalǵan librettony abbat Prevonyń «Kavaler de Grie men Manon Leskonyń oqiǵasy» romanynyń jelisi boiynsha jazǵan. Orkestrge laiyqtap, aranjirovkasyn jasaǵan – Martin Iets. Dekoratsiialar jáne kostiýmder boiynsha sýretshi – Nikolas Georgiadis. «Astana Opera» sahnasynda qoiylymdy júzege asyrǵan baletmeisterler Karl Biornett, Patrisiia Rýann. Dekoratsiialar boiynsha úilestirýshi – Chintsia Lo Fatsio, kostiýmder boiynsha úilestirýshiler – Nataliia Stiýart, Arasel Dosmuratova, jaryq boiynsha sýretshi – Iakopo Pantani. «Astana Opera» Simfoniialyq orkestri qoiýshy dirijer Arman Orazǵalievtyń jetekshiligimen óner kórsetedi.
30 qańtar kúni Manon partiiasyn Qazaqstannyń eńbek sińirgen qairatkeri Áigerim Beketaeva oryndaidy, kavaler de Grie – Oljas Tarlanov. Lesko – Arman Orazov, Leskonyń kóńildesi – Qazaqstannyń eńbek sińirgen qairatkeri Ánel Rústemova. G.M. myrza – Jánibek Imanqulov, Qart myrza – Rýslan Temirbekov, Qaraýyl basshysy – Oljas Mahanbetáliev, Madam – Altynai Qaǵazbaeva, Kedeilerdi bastaýshy – Beibarys Aqarys. «Astana Opera» balet trýppasynyń kórkemdik jetekshisi – Reseidiń Halyq ártisi Altynai Asylmuratova.
Spektakldiń bastalýy saǵat 19:00-de.
