«Astana Opera» teatrynyń bas dirijeri, Qazaqstannyń eńbek sińirgen qairatkeri, Memlekettik syilyqtyń laýreaty, áigili maestro Alan Bóribaev elorda turǵyndary men qonaqtarynyń nazaryna ázil aralas ekskliýzivti baǵdarlama - «Moler, Volter jáne Bomarshe, nemese Frantsýz komediiasynyń negizin salýshylar» atty operalyq-simfoniialyq kontsert usynady, dep habarlaidy "Ult aqparat".
Kontsert 17 jáne 18 qazan kúnderi ótedi.
Qazaqstanda jáne shet memleketterde Alan Bóribaevti eń biik deńgeidegi maestro retinde tanidy. Onyń dirijerligimen túrli elderdiń simfoniialyq orkestrleri oinaidy. Budan bólek, onyń daryndylyǵynyń taǵy bir qyry – álemdik mýzykalyq qaýymdastyq arasynda rezonans týdyratyn jobalardy shyǵarýy. Olardyń ishinde Qazaqstan, Italiia jáne basqa elderden kelgen myńnan astam mýzykanttyń oryndaýyndaǵy Gýstav Malerdiń №8 simfoniiasy, Karl Djenkinstiń SHINE ASTANA saltanatty odasy bar. Jyldyń basynda qoiylǵan «Italiiadan kelgen hattar» operalyq-simfoniialyq kontserti tyńdarmandardyń ystyq yqylasyna bólenip, júrekterinen oryn aldy. Asqaq ónerdiń jankúierleri maestrodan shyǵarmashylyq tartýlardyń jalǵasyn asyǵa kútti.
A.Bóribaev usynyp otyrǵan «Moler, Volter jáne Bomarshe, nemese Frantsýz komediiasynyń negizin salýshylar» atty baǵdarlamanyń ózgesheligi – kontsertte Jan-Batist Molerdiń «Meshanin vo dvorianstve» komediiasynyń erkin oqylýynda, maestronyń ózi jasaǵan monolog nusqasy Rihard Shtraýstyń osy komediiaǵa arnap jazǵan mýzykasynan siýitamen birge shyrqalady. Ár jyldary atalǵan pesadaǵy mýzykalyq jáne dramalyq bastaýlardy úilestirý tujyrymdamasyn maestro A.Bóribaev Baltimor (AQSh), Dýblin (Irlandiia), Mainingende (Germaniia) usynyp, ónersúier qaýymnyń zor qyzyǵýshylyǵyn týdyrǵan bolatyn.
Mýzykalyq monologtyń negizgi qaharmany Molerdiń keiipkeri Jýrden myrza ekenin atap ótken jón, Alan Bóribaev ony kúlkili, súikimdi, sóite tura ańqyldaq ári pań minezdi adam retinde kórgen. Bas keiipkerdiń tula boiy balalyq bilimqumarlyq pen balaǵa tán ǵashyq bolǵyshtyq qasietterge toly. Maestro Jýrdenniń ziialy ortalarda tanylýǵa degen toqtamsyz qumarlyǵyn kórsetýdegi Molerdiń qoltańbasyn saqtap qalǵan. Barlyq oqiǵa osynyń ainalasynda órbidi. Jýrden myrzany orkestr mýzykanty Áset Neldibaev somdaidy.
Mýzykalyq keshti frantsýz komediiasynyń altyn ǵasyrynyń klassikteri Moler, Volter jáne Bomarsheniń mátinderine jazylǵan shyǵarmalar usynylatyn mazmundy baǵdarlama jalǵastyrady.
Sonymen qatar talǵampaz jurtshylyq nazaryna Volter men L.Bernstain, P.Bomarshe men V.Motsart, Moler men R.Shtraýstyń ómiri men shyǵarmashylyǵy týraly ocherkter usynylady. Ádebi arqaý kontserttiń mýzykalyq mazmunyn ásemdikpen kómkeredi.
«Astana Opera» sahnasynda alǵash ret kontserttik baǵdarlama aiasynda V.Motsarttyń «Figaronyń úilený toiy» operasynan ekinshi bólimniń finaly oryndalatynyn atap ótý kerek.
Keshke Qazaqstannyń eńbek sińirgen qairatkerleri Talǵat Musabaev, Aigúl Niiazova, Bashqurtstan Respýblikasynyń eńbek sińirgen ártisi Alfiia Karimova, «Qurmet» ordeniniń kavaleri Aizada Qaponova, halyqaralyq baiqaýlardyń laýreattary Talǵat Ǵaleev, Evgenii Chainikov, Gúljanat Sapaqova, Erjan Saiypov, Shyńǵys Rasylhan, Erulan Kámel jáne taǵy basqalary qatysady.
Kontserttiń rejisseri – Erenbaq Toikenov.
