Qazaqstan OPEK-pen munai óndirý kólemin azaitý, nemese arttyrmaýǵa qatysty kelissóz júrgizip jatyr. Resei munai kartelimen óndiris kólemin azaitýǵa qatysty kelisýge daiyn ekenin bildirdi. Resei energetika ministri Aleksandr Novak Máskeýdiń OPEK-tiń munai óndirý kólemin shektei turý usynysyn qoldaýǵa daiyn ekenin málimdedi. Qazaqstan energetika ministri Qanat Bozymbaev Astana kelissózdi jalǵastyryp jatqanyn aitty.
Aleksandr Novak OPEK uiymnyń 30 qarashada Venada ótetin formaldy otyrysyna deiin munai óndirisi kólemin shektei turýǵa kelise alady degen úmitte ekenin bildirdi. "Naryqta mundai jetistikke qol jetkizý - oń belgi jáne uiymǵa kirmeitin elder, onyń ishinde Resei naryqtaǵy is-qimyl týraly sheshimdi birge qabyldaýǵa qatysady. Menińshe, kelisimge kelýge múmkindik mol. OPEK-tiń óz ishindegi jaǵdai biyl sáýirde Dohada bolǵan kelispeýshilikpen salystyrǵanda áldeqaida táýir" degen Novak TASS agenttigine.
TASS-tyń habarlaýynsha, Qanat Bozymbaev Astana OPEK-pen kelissóz júrgizip jatqanyn aitqan. Ol Qazaqstan biyldyń ózinde óndiris kólemin aitarlyqtai azaitqanyn jetkizgen. "Qazaqstan biyldyń ózinde óndiris kólemin kádimgidei azaitty. Ótken jyly biz 80 million tonna óndirgenbiz, biyl bul kórsetkish 76,5 million tonnany quraidy" dedi Bozymbaev.
Qazaqstan energetika ministri Qazaqstannyń eń iri ken orny - Qashaǵannan óndiris kóleminiń jalpy túrde azaiǵanyna qaramastan qosymsha munai beretinin habarlady. Ol "kenishke 50 milliard dollardan astam qarjy salǵan halyqaralyq investorlar aldynda alǵan mindettemesi bolǵandyqtan Qashaǵannan munai óndirý toqtamaitynyn aitty. Bozymbaevtyń sózinshe, Qashaǵannan munai óndirý kólemi birden emes, birtindep artady.
