Pandemiia kezinde aýditoriia shynaiy aqparatty izdep, dástúrli baspasóz quraldaryna júgine tústi. Astana Media Week 2020 sharasynyń «Mýltiplatformalylyq» plenarlyq sessiiasyn júrgizgen «QazAqparat» HAA Basqarma tóraǵasy Asqar Ýmarov osyndai pikirin bildirdi, dep habarlaidy QazAqparat.
«Baspasóz salasyna internet kelgennen keiin aýditoriiasyn joǵaltpaý úshin aqparat quraldary ártúrli platformalarda jumys isteýi kerek. Qazirgi ýaqytta jýrnalistika kúrt ózgerip ketti. Ár bes jyl saiyn bir jańashyldyqtar kelip jatyr. Mýltiplatformalylyq bul rette – qazir syn-tegeýrin ǵana emes, sonymen qatar aýditoriiany arttyrýdyń, sapaly aqparatty qoldanýshyǵa jetkizýdiń úlken múmkindigi.
Kóp jaǵdaida mýltiplatformalylyqpen aqparat agenttikteri jumys isteidi. Olar sapaly jańalyqtardy óte jyldam jetkize bilýi tiis. Bizdiń bilýimizshe dástúrli baspasóz quraldarynyń, gazetterdiń kóbi platformalarǵa ótip jatyr. QazAqparat agenttiginiń 100 jyldyǵy aiasynda búgin biz óte ózekti taqyrypty talqylaimyz», - dedi Asqar Ýmarov.
Onyń aitýynsha pandemiia kezinde aýditoriia shynaiy aqparatty izdep, dástúrli baspasóz quraldaryna júgine tústi.
«Sonymen birge feik-jańalyqtardyń óz órisinde artyp kele jatqanyn da esepke alý kerek. Media salada negizgi mindeti feik-jańalyqtarǵa jol bermeý boiynsha jańa baǵyt paida boldy. Odan bólek faktcheking týraly da bilemiz. Biz áriptesterimizben birge únemi aqparat bólisemiz. Bizdiń platformalarǵa jalǵan aqparattyń kelmeýi úshin jumys júrgizip jatyrmyz», - dedi Asqar Ýmarov.
Aita ketsek eloradada Astana Media Week 2020 sharasy ótkizilýde. Is-sharanyń negizgi maqsaty – otandyq mediasalany damytý men indýstriiadaǵy iskerlik qarym-qatynasty aimaqtyq jáne halyqaralyq deńgeide ilgeriletý. Mediaaptalyq tórtinshi jyl qatarynan álemniń túpkir-túpkirinen jetekshi sarapshylardy dástúrli túrde jinap keledi jáne ózekti taqyryptar talqylanady.
