Open Air jyry...
nemese Astana kúnine Resei ánshilerin shaqyra berýdi qashan toqtatamyz?!
Sonda Resei ánshilerin shaqyrmaý kerek pe, - dep surady menen Astana qalasy ákiminiń orynbasary Ermek Amanshaev aǵamyz. Shaqyrýdyń reti bolady, shaqyryńyzdar, biraq memlekettik merekemizde óz ánshilerimiz turǵanda, ózge eldiń ánshilerin lek-legimen aldyryp, alty saǵattyq kontsert berý artyq dep jaýap berdim. Endi áńgime qai jerde, neden bastaldy, ne týraly boldy, soǵan toqtalsam. Áziret Sultan meshitinde Astana ákimi Áset Órentaiulynyń atynan berilgen aýyzashardan shyǵyp turǵan sátimiz edi. Teatr akteri Nurken Óteýil Astana ákiminiń orynbasary Ermek Ámirhanulymen sóilesip kele jatyr eken. Janymyzda aitysker aqyn Serikzat Dúisenǵazy, aqyn Baýyrjan Qaraǵyzuly, taǵy birneshe jigit turǵan. Áńgimege men de aralasyp, Ermek aǵamyzǵa Astana ákimdiginiń mádeniet baǵytyndaǵy birneshe jumysyna kóńilim tolmaitynyn, únemi Reseige eliktep, solardan ánshi shaqyratynyn, olarǵa biýdjetten qansha qarjy shyǵyndalatynyn eldiń bilmeitinin, jalpy Open Air degen ashyq aspan astyndaǵy kontsertke Resei ánshileriniń jyl saiyn sonsha kóp shaqyrylatynyn túsinbeitinimdi, buǵan qarsy ekenimdi aitqanymda, ákim orynbasarynyń áńgime basynda keltirilgen «tańqalǵan jaýabyn» estidim.
Aqparat úshin aita ketsem: 29 mamyrda Astana ákimdiginiń Mádeniet jáne sport basqarmasynyń muryndyq bolýymen, «Qazaq eli» monýmenti aldynda, Astanamyzdyń 20 jyldyq memlekettik merekesine arnalǵan eń alǵashqy shara - Open Air kontserti ótti. Deni Resei estrada juldyzdary qatysqan kontserttiń aty «Uly dala birligi» dep atalypty. Reseiden Dima Bilan, Iýliana Karaýlova, Sergei Lazarev, Anna Sedokova, Natan, Anna Semenovich, Djigan, Elena Temnikova, Timýr Rodrigez, Maks Barskih, Misha Marvin, «Gradýsy» toby, Artik&Asti jáne basqalary, al óz elimizden Qairat Nurtas, Aiqyn, Mádina Sádýaqasova, Kámshat Joldybaeva, Álisher Kárimov, Erke Esmahan, Rinat Maltsagov, Ringo jáne Ninety One toby óner kórsetti. Bir aqparatta 50 myń, taǵy birinde 100 myń adam jinaldy delingen. Sonsha kóp adam tarttyq, bul asa mańyzdy degen ustanymdary bolsa kerek. Ókinishtisi sol, Reseiden shaqyrylǵan ánshilerge bizdiń kórermen sonsha yntyzar deýge kelmeidi. Astana qalasy Mádeniet jáne sport basqarmasynyń basshysy Bolat Majaǵulovtyń ózi aitqandai, jinalǵandardyń basym bóligi «91» tobyn tyńdaý úshin kelgen. Resei ánshileri únemi shaqyrylatyn Open Air kontsertiniń biyl tórtinshi márte uiymdastyrylyp otyrǵanyn da aita ketken jón.
Endi mende suraq: Reseidiń memlekettik merekesine qazaq elinen qansha ánshi shaqyrylady? Shaqyryla ma ózi? Bizge kelgen (keletin) Resei ánshilerine qansha qarjy bólindi, qaidan bólindi jáne kim ruqsat berdi? Dostyǵymyz ben birligimizdi kórsetkisi kelse Reseiden, Ózbekstan, Qyrǵyz eli, basqa da alys-jaqyn elderden nege bir-birlep ánshi shaqyrylmaidy? Nelikten biz únemi Reseiden shaqyramyz? Nege biz rýhaniiatymyzǵa qatysy joq osyndai sharalarǵa Rýhani jańǵyrýdyń belgisin qoiyp qoiamyz?
Aitpaqshy, Ermek Amanshaevpen bolǵan qysqa áńgime barysynda, biz óz ónerimizdi túgendep otyrmyz, sondyqtan Reseiden shaqyrǵannyń da aiyby joq degen pikir aityldy. Kelispeimin. Shetten kelgender memlekettiń qoldaýymen qymbat, záýlim sarailarda óner kórsetip jatqanda, bizdiń «Shanshar», «Aldaraspan» siiaqty óner ujymdary óz esebinen jartylai qarańǵy, kontsert ótkizýge arnalmaǵan jerlerde halyq jinaýǵa májbúr. «Óner qyrandary» siiaqty qoldaýshysy joq teatrlardyń jaiy aitpasa da túsinikti. Osy jerde oqyrmandarǵa suraǵym: Astananyń 20 jyldyǵynda qandai ánshilerdi, teatrlardy, basqa da óner ujymdaryn qoldaý kerek dep sanaisyz? Múmkin bul usynysymyzdy Astana ákimdigi qabyl alar?
Jyǵylǵanǵa judyryq demekshi, Astana kúnine orai Resei komandalarynyń qatysýymen KVN-nen Eýraziia kýbogy ótetin bolypty. Jarnamasyn qatelesip «kýbogI» dep jazyp qoiǵan. Oiynǵa Reseiden alty, bizden eki top qatysady. Al, óz jastarymyzǵa jaqyn «Jaidarman» oiynshylary Astana kúninde bar ma eken ózi?
Mádi Manatbektiń feisbýktegi jazbasynan
