Turǵyn úiler men qoǵamdyq oryndarda beinelengen mýraldar elordanyń kelbetin ashyp, jarqyn boiaýlarmen, túrli kompozitsiialarmen kórik berip tur. Nur-Sultan kóshelerindegi art-óner galereiasy qazaqstandyq jáne sheteldik sýretshilerdiń týyndylaryna asa bai. Qaladaǵy erekshe mýraldarǵa elorda ákimdiginiń resmi saity sholý jasaǵan, dep habarlaidy "Ult aqparat".
«Ǵarysh ortasy» mýraly - osy jazda Qabanbai batyr dańǵylyndaǵy Dóńgelek alańnyń kópir astyndaǵy aýmaǵynda paida boldy. Jumbaq ǵalam, zerttelmegen planetalar men ǵaryshtyq deneler bul jerge erekshe atmosfera syilaidy.
Qazaqtyń uly aqyny Abaidyń portreti Abai dańǵylynda ornalasqan kópqabatty úidiń sánin keltirip tur. Bul jumys aqynnyń 175 jyldyǵyna orai Baiqońyr ákimdiginiń qoldaýymen salyndy.
Koronavirýspen kúreste aldyńǵy shepte júrgen meditsina qyzmetkerlerine arnalǵan «Biz birgemiz» mýraly. Kompozitsiia Saryarqa jáne Jangeldin kósheleriniń qiylysyndaǵy kópqabatty úidiń qabyrǵasynda beinelengen.
Elordadaǵy turǵyn úilerdiń birinde oryndalǵan «Illiýstratsiia» keiipkerler galereiasyn sýretshi Aleksandra Kalacheva 2018 jyly Urban Fest Astana aiasynda salǵan. Sýretterde qala turǵyndarynyń kúndelikti ómiri beinelengen.
Ázerbaijandyq sýretshi Samir Salahovtyń «Daladaǵy tús» strit-artynda(Moldaǵulova kóshesindegi úide) barys pen aqbóken beinelengen.
Esenberlin kóshesindegi úide Zmogk-tyń «Tarih» mýraly ornalasqan. Bul mýraldyń jarqyn tústeri kóz tartady. Sýrette tarihi oqiǵalardy qaǵazǵa túsirip otyrǵan qyzdy kórýge bolady.
Evgenii Ches-tiń «Tabiǵat taqyrybyndaǵy kollajy» beton úiler, shyny ǵimarattarmen astasqan qalalyq kóriniske tabiǵat motivterin aralastyrady.
