«Astana» halyqaralyq qarjy ortalyǵynyń ashylýy Qazaqstannyń jahandyq oiynshylar úshin ashyqtyǵyn bildiredi. Mundai pikirdi búgin elordada ótip jatqan qazaqstandyq-amerikalyq biznes-forým barysynda AQSh Saýda ministri Ýilbýr Ross bildirdi, dep habarlaidy QazAqparat tilshisi.
«Astana» halyqaralyq qarjy ortalyǵynyń ashylýy - bul jahandyq oiynshylar úshin eldiń ashyqtyǵynyń belgisi. Biz Ortalyq Aziia jónindegi kelisimnen taimaimyz jáne bul búkil óńirge múmkinshilik beredi. Bul Prezident Nursultan Nazarbaevtyń barynsha qarqyndy ekonomikaǵa jetý jolyndaǵy kóregendigin kórsetedi», - dedi Ýilbýr Ross.
Ol «ashyq áýe ustanymy» jónindegi amerikalyq-qazaqstandyq kelisimge taiaý arada qol qoiylatyndyǵyna senimdi ekendigin jetkizdi. Atalǵan qujat Qazaqstan men Amerika Qurama Shtattarynyń qalalary arasyndaǵy ushý shekteýlerin alyp tastaý degendi bildiredi. Shekteýlerdiń alynýy taiaý arada eki eldiń arasyndaǵy áýe kóligimen qatynaityn jolaýshylar legin arttyra túsedi.
Sonymen qatar AQSh ministri eki eldiń munai men gaz salasyndaǵy yntymaqtastyǵy barynsha joǵary deńgeide ekendigin basa aitty.
Aita keteiik, forým jumysyna QR Premer-Ministriniń birinshi orynbasary Asqar Mamin, 20-dan astam amerikalyq kompaniianyń basshysy, qazaqstandyq biznes ókilderi, ministrlikter men vedomstvolardyń basshylary qatysty.
Shara aiasynda aýyl sharýashylyǵy, infraqurylymy, aviaqurylys, tsifrlandyrý jáne aqparattyq tehnologiialar salalaryn qamtityn 8 ekijaqty qujatqa qol qoiyldy.
Esterińizge sala ketsek, AQSh-tyń Saýda ministri Ýilbýr Ross elimizge sapary aiasynda Elbasy Nursultan Nazarbaevpen jáne QR Premer-Ministri Baqytjan Saǵyntaevpen kezdesken bolatyn.
