Otandyq jáne sheteldik BAQ aldynda baspasóz máslihatyn ótkizgen «Astana» Halyqaralyq qarjy ortalyǵynyń basqarýshysy Qairat Kelimbetov atalǵan ortalyqtyń Qazaqstan ekonomikasyna ne beretini týraly saýalǵa jaýap berdi, dep habarlaidy QazAqparat tilshisi.
«Astana Halyqaralyq qarjy ortalyǵy eń aldymen tikelei sheteldik investitsiialardy tartady. Ózderińiz biletindei, Qazaqstan ekonomikasy sońǵy 10-15 jylda óte joǵary qarqynda damydy. Osy aralyqta 200 mlrd AQSh dollaryna jýyq shetelden investitsiia tarttyq. Al osy investitsiialar kóp jaǵdaida tabiǵi resýrstarǵa tartylǵan bolatyn. Búgin bizge ońtaily sektorlarǵa áli de tartyp jatyrmyz. Sondyqtan, Astana HQO eń aldymen sheteldik investitsiialardy tartýdaǵy «tereze» ispettes. Sáikesinshe ekonomikamyz damyp, ulttyq valiýtamyz turaqty bola túsedi», - dedi Qairat Kelimbetov.
Eske sala ketsek, QR Prezidenti Nursultan Nazarbaevtyń bastamasymen qurylǵan AHQO uzaq merzimdik damýǵa baǵyttalǵan bes institýtsionaldyq reformany júzege asyrýǵa arnalǵan «100 naqty qadam» Ult josparynyń bóligi. AHQO-nyń arnaiy mártebesi QR Konstitýtsiialyq zańymen zańdy túrde bekitilgen. TMD elderi arasynda tuńǵysh ret aǵylshyn saýda quqyǵy qaǵidattary men álemdik beldi qarjy ortalyqtarynyń talaptaryna sáikes (London, Niý-Iork, Gongkong, Singapýr, Dýbai jáne t.b) qurylǵan ózindik quqyqtyq arnaiy quzirettik aýmaq AHQO-da qurylmaq. AHQO bazasynda álemdik myqty talaptarǵa sai joǵary tehnologiialyq jańa birja iske qosylatyn bolady. AHQO-nyń negizgi strategiialyq damýy kapital naryqtaryn damytý, aktivterdi basqarý, jeke tulǵalardyń dáýletin basqarý, islamdyq qarjylandyrý, qarjylyq tehnologiia sekildi baǵyttardy qamtidy.
