Aqmola oblysynyń Qosshy qalasynda úsh jańa mektep salynyp jatyr. Bilim salasyna jaýapty jergilikti mamandardyń aitýynsha, osynyń arqasynda 2023 jyly 3 aýysymmen bilim beretin nysandardyń problemasy sheshiledi, dep habarlaidy QazAqparat.
Áleýmettik jelide aýysym kezinde mektepke balalar syimai qalatyny týraly video taraǵan bolatyn. Salaǵa jaýapty Tselinograd aýdany bilim bóliminiń mamandary osy jaǵdaiǵa qatysty túsinikteme berdi.
«Qala boiynsha árqaisy 1200 oryndyq úsh mektep salynyp jatyr. Olardyń bireýi biyl jeltoqsanda salynyp bitedi dep josparlanýda. Ekinshisi «Qosshy-2»-de, iaǵni «Lesnaia Polianada» kelesi jyly tamyz-qyrkúiek ailarynda daiyn bolady. Al úshinshi mektep 2023 jyly aiaqtalady. Sonda qalanyń damý jospary boiynsha 2023 jyly qazirginiń ústine 3600 jańa oryn ashylady», - deidi Tselinograd aýdandyq bilim bólimi ádistemelik kabinetiniń meńgerýshisi Maira Baibolatova.
Mamannyń aitýyna qaraǵanda, Instagram-da taraǵan videoda eki aýysym oqýshylarynyń qarbalasy túsip qalǵan.
«Joǵarydaǵy videoǵa kelsek, ol №1 mektepte túsirilgeni málim. Bul mektepte jalpy eki ǵimarat bolsa, birinshisi 436 orynǵa, ekinshisi 850 orynǵa shaqtalǵan. Jiyny 2347 bala úsh aýysymmen bilim alady. Osyndai balalar aýysymy kezinde qarbalas bolǵan», - dep jaýap berdi.
Eske sala keteiik, Qosshydaǵy №2 mekteptiń birinshi synybyna biyl 635 bala kelgen. Munda qonystanýshy turǵyndar sany jyldan jylǵa artyp keledi. Sol sebepti Qosshyǵa biyl oblystyq deńgeidegi mańyzy bar qala statýsy berilgen bolatyn.
