Deliden Astanaǵa ushyp kelgen jolaýshy qandai aýrýǵa shaldyqqany 2 kúnnen keiin naqty anyq bolady. Bul týraly búgin Úkimet otyrysynan keiin BAQ ókilderine elimizdiń Bas sanitarlyq dárigeri Jandarbek Bekshin málim etti, dep habarlaidy QazAqparat tilshisi.
«Diagnozyn naqtylaý úshin olarǵa juqpaly aýrýlar arýhanasyna jatý usynylǵan edi. Naýqastar uzaq ýaqyt boiy kelispei qoidy. Túptep kelgende olar bakteriologiialyq-zerthanalyq zertteýden ótý úshin aýrýhaǵa jatqyzyldy. Sodan keiin olar eresekterge arnalǵan juqpaly aýrýlar aýrýhanasynda jeke orynǵa oqshaýlandyrylyp, saraptama alyndy. Naqty diagnoz qoiý úshin polimerazalyq tizbekti reaktsiiaǵa, immýnofermenttik saraptamaǵa úsh oń zertteý qajet. Zertteý klassikalyq ádispen júrgiziledi. Naqty diagnoz 2-3 kúnnen keiin qoiylady. Aldyn ala diagnozy - «anyqtalmaǵan etiologiianyń ótkir ishek infektsiiasy». Biraq biz tyrysqaq kúdigimen de jumys jasap jatyrmyz», - dedi ol.
Sonymen qatar Bekshin naýqas ushyp kelgen ushaqqa tolyqtai zararsyzdandyrý jumystary júrgizilgenin aitty.
«Áýejaidyń barlyq qyzmetteri jumyla jumys istedi. Ushaq qonar aldynda shuǵyl shtab ótip, túsindirý jumystary úshin ushaq qonatyn oryn anyqtaldy. Júkter, kólik, avtobýs zararsyzdandyryldy. 30 minýttan keiin jolaýshylar shekaralyq baqylaýdan ótýge jiberildi», - dedi Bas sanitar dáriger.
Eske sala keteiik, bir jolaýshynyń tyrysqaq aýrýyn juqtyrýy múmkin degen aqparat keshe keshki saǵat 19:30-da túsken. Air Astana ushaǵy Deliden Astanaǵa ushyp kele jatqan. Lainer elorda áýejaiyna 23:50-de jetti, ushaq bortynda 136 jolaýshy bolǵan.
Tyrysqaq juqtyrǵan bolýy múmkin degen Ýkraina azamatynyń qyzýy kóterilip, ishi ótken, loqsyǵan.
