Astanada til basqarmasyn jabý ne úshin kerek boldy, buǵan kim arasha túse alady?!
Eldi oilaityn erteńshil ákim dep maqtaǵan Baqyt Sultanovtyń búgingi sheshimi shynymen jaǵa ustatty. Elordamyzda memlekettik til máselesi sheshilip qoiǵandai, endi til basqarmasy derbes mekeme retinde jumys istemeitin bolypty. Bul ákimniń de til degende tiksinip qalatynyn kim bilgen.
Sultanovtyń sheshimine sáikes Astanadaǵy qoǵamdyq-ideologiialyq jumysty endigide jańa qurylǵan Qoǵamdyq damý basqarmasy júrgizedi. Bul mekemege qoǵamdyq damý basqarmasy, mádeniet jáne sport basqarmasy, tilderdi damytý jáne arhiv (muraǵat) isi basqarmasy biriktiriledi. Ákimniń bul ekonomikalyq turǵyda paidaly, qarjy únemdeledi degenin estip jatyrmyz. Áitsede til máselesinde, ideologiia salasynda, ásirese ulttyq sana quldyraǵan qazirgi kezeńde únem degendi aitýdyń ózi jaýyzdyqpen para-par.
Soltústik aimaqtardy aitpaǵannyń ózinde, qaimaǵy buzylmaǵan Túrkistan jáne Jambyl oblystarynda til basqarmalary jumys istep keledi. Endeshe Astanaǵa ne joryq? Tilderdi damytý basqarmasynyń arqasynda Astana qazaqylanyp kele jatqan. Orazkúl Asanǵazy, Erbol Tileshov, Tileýǵali Qyshqashbaevtardyń bastamasymen qala kósheleri, aýdandaryna qazaqsha ataýlar berilip, saýda ortalyqtary men ǵimarat mańdaishalaryndaǵy ataýdy qazaqsha saýatty jazý jumystary qadaǵalana bastaǵan. Til basqarmasyna júrekti azamattar jumysqa alynyp, eriktiler toby qurylyp, Astanada til tazalyǵyn talap etýshi jastar kóbeigen. Rýhaniiat ortalyǵy ashylyp, ult úshin mańyzdy is-sharalar ótkizile bastaǵan.
Til mártebesi – el mártebesi. Elbasynyń aýzymen aitsaq: "Tilge degen kózqaras – shyndap kelgende, elge degen kózqaras. Qazaq tili – Qazaqstan Respýblikasynyń memlekettik tili. Oǵan kóńil de, qarjy da solai bólinedi". Budan asyp qalai aitýǵa bolady. Túsingen adamǵa bul jái sóz emes tapsyrma. Sondyqtan Sultanovtyń búgingi sheshimin asyǵys jasalǵan qadam dep sanaimyn. Basqadan únemdese de tildik, ulttyq máseleden únemdeýdiń keregi joq. Ásirese áleýmettik máseleler ýshyqqan qazirgi kezeńde. Til – ulttyń súienetin túp tamyry. Endeshe tilderdi damytý basqarmasyn derbes mekeme retinde saqtap qalýǵa áli de bolady dep senemin. Kóp túkirse kól degen. Eldigimizdi bildireiik, el bolyp talap eteiik.
Mádi Manatbektiń feisbýktaǵy jazbasynan
