Óz ultynyń ereksheligin, óz mádenietiniń ozyq úlgilerin keler urpaqqa jetkizýdi maqsat etken el qundy muralaryn IýNESKO-nyń materialdyq emes muralar tizimine engizýge umtylady. Sońǵy jyldardyń ózinde dombyrada tartylǵan kúi, kiiz úi, qazaq kúresi, asyq atý siiaqty ultymyzdy sipattaityn óner, sport, turmys erekshelikterimiz álem elderiniń eń ejelgi muralary retinde osy tizimge engen.
Kelesi qadam osy qundylyqtardy el ishinde dáripteý, olardy óz urpaqtarymyzdyń qasterli mura retinde qadir tutýy baǵytynda jasalýy kerek. Sondyqtan «tizimge endi, sharýa sonymen bitti» degen oidyń jeteginde ketýge bolmaidy.
Bul rette Memleket basshysynyń shildeniń birinshi jeksenbisin Ulttyq dombyra kúni dep belgileý týraly Jarlyǵynyń astarynan osyndai oidy uǵýymyz kerek. Álem qadirleitin mura, kóne aspabymyz dombyrany óz elimizde ulyqtaý qazir qanshalyqty dárejede? Bolashaqta qandai bolmaq? Dombyranyń birtutas Qazaqstan halqy úshin mańyzy qandai?
Bul týraly 22 maýsym kúni Qazaqstan halqy Assambleiasy Jýrnalister men sarapshylar klýbynyń Almatyda ótkizilgen keńeitilgen otyrysynda sóz sóilegen QHA Tóraǵasynyń orynbasary – Hatshylyq meńgerýshisi Leonid Prokopenkonyń pikiri jinalǵandar nazaryn aýdarǵanyn aita ketken jón dep bilemin.
Tóraǵanyń orynbasary sóziniń basynda Ulttyq dombyra kúniniń qarsańynda tusaýy kesilgen Assambleianyń «Qazaqtaný» jobasyna bylai dep toqtala ketti: «Jobanyń bar qazaqtyń basyn qosqan Abylai hannyń alańynda bastalýynyń tereń mańyzy bar – biz de ortaq qundylyqtarymyzdy nyǵaitý úshin kúsh-jigerimizdi biriktiremiz. Memleket basshysy aitqandai, bizdiń birligimiz qazaq halqynyń tutastyrýshy róline negizdeledi. Qazaqstannyń ár azamaty qazaq halqynyń úzdik qasietterin óz boilaryna sińirýleri kerek».
Ári qarai Leonid Prokopenko otyrysqa qatysýshylarǵa Ulttyq dombyra kúnine Assambleia erekshe daiyndalyp jatqanyn jetkizdi: «Biz mereke kúni dúniege birinshi bolyp kelgen ár náresteni Assambleianyń atynan quttyqtap, dombyra syilaityn bolamyz. Jáne bul aktsiia búkil elimizde ótkiziledi. Iri qalalarda da, aýdan ortalyqtary men aýyldyq jerlerde de perzenthanalarǵa bizdiń ókilderimiz baryp, logotipimiz bar dombyra men quttyqtaý hatty tabys etetin bolady».
Biyl alǵash ret, búkil elimiz bolyp joǵary dárejede atap ótilgen Ulttyq dombyra kúniniń bir erekshe aktsiiasy osy – nárestege dombyra tartý etý bolǵany anyq.
Bul kúni Astanadaǵy Ana men bala ulttyq ǵylymi ortalyǵyna arnaiy kelgen QHA Tóraǵasynyń orynbasary – Hatshylyq meńgerýshisi L. Prokopenko, Hatshylyq meńgerýshisiniń orynbasary N.Shanai, QR Prezidenti janyndaǵy «Qoǵamdyq kelisim» respýblikalyq memlekettik mekemesiniń qyzmetkerleri, mereili mereke kúni dúniege perzent ákelgen ana Bekbota Alýany quttyqtap, ulyna arnalǵan dombyra men quttyqtaý hatty tabys etti.
Quttyqtaý sózinde QHA Tóraǵasynyń orynbasary L. Prokopenko Elbasy Jarlyǵymen belgilengen Ulttyq dombyra kúnin qoldaý úshin Assambleia búkil el boiynsha «Qasietti dombyra» aktsiiasyn ótkizip otyrǵanyn habarlai kelip: «Dombyra – shańyraq, qazan siiaqty qazaq halqynyń simvoly. Qazaq halqynyń búkil tarihynda dombyra birge bolyp, el basynan ótken qýanysh pen qaiǵyny búgingi kúnge jetkizgen. Elimizdiń jas azamatyna osy qasietti dombyrany syilai otyryp, ony ómir boiy serik etsin dep tileimiz» dep atap ótti.
Quttyqtaýǵa kelgenderdiń atynan Ibraiymbekov Balǵabai sóz sóilep, dombyraǵa qosylyp, án áýeletti.
Assambleia tabys etken quttyqtaý hatta jas qazaqstandyqqa mynadai arnaý sóz jazylǵan:
"Ainalaiyn!
Sen týǵan elińniń ǵajap dáýirinde dúniege keldiń! Seniń Otanyń Qazaqstan – ul men qyzy erkin, damýy qarqyndy, eshbir eldiń aldynda tize búkpeitin táýelsiz memleket!
Sen onyń tý tikken elordasy – Astananyń 20 jyldyǵy atalyp jatqan kezeńde jaryq dúniege kelip, Uly Dala Eliniń jupar aýasymen tynystai bastadyń! Bul – seniń dalań! Bul – seniń Astanań, ainalaiyn!
Endi sen ulanǵaiyr dala tósinde boi kótergen ǵajaiyp qala – Astanamen birge ósip, biikterge elińmen birge órleisiń. Seniń jarqyn ómiriń bastaý alatyn búgingi kúnniń – otbasyń úshin de, Otanyń úshin de taǵlymy tereń, mańyzy zor merekemen sáikes kelýimen qymbat.
Qazaqstan Respýblikasynyń Tuńǵysh Prezidenti – Elbasy Nursultan Nazarbaev óz Jarlyǵymen shilde aiynyń alǵashqy jeksenbisin Ulttyq dombyra kúni dep belgiledi. Bul – sen týǵan elde halyqty ulttyq mádeniet pen biregeilikti saqtap, qaita jańǵyrtý ideiasynyń tóńireginde toptastyrýdy maqsat etetin mereke.
Bolashaqta seniń osy asyl ideiany iske asyrýshylar qatarynda bolatynyńa senimdimiz. Ónegeli, ónerli jolyńda DOMBYRAŃ jan serigiń bolsyn!
Úlken ómirge jasaǵan qadamyń qutty bolsyn, Uly Dala perzenti!"
Kamal Alpeisova
