Dat!!!
Tal besik pen jer besiktiń arasynda ómir súretin Adamnyń basy - Allanyń doby ekeni - aqiqat, alaida Adamnyń taǵdyry - pendeler úshin oiynshyqqa ainalmaýy tiis.
Erlan Bilál - belgili teatr jáne kino akteri, júregi "Óner" dep soqqan elimizge tanymal saxnager, memleketimizdiń rýxani keńistiginde oiyp alar orny bar aiaýly Azamat, ónegeli otbasynyń iesi! Ónerimen, óziniń azamattyq tulǵasymen sańlaq aǵalarymyz ben apalarymyzdy tamsandyryp, zamandastary men dostaryn, ini-qaryndastaryn moiyndatqan, teatrdyń Analarynyń aq batasyn alǵan Erlan - shyn mánindegi jany da, ary da taza azamat!
Sonaý toqsanynshy jyldardyń ortasynda ónerge qubylys bolyp kelgen Erlan Bilál, Dýlyǵa Aqmolda, Bekjan Turystar tuiaǵy tekti tulpar syndy óner alamanynda myńdaǵan kórermendi tamsantty, tebirentti, rýxtandyrdy. Saxna men ekrannyń sáni bolǵan Erlannyń kókeikesti maqsaty da sol - ónerdiń uly kóshinde elge, ultqa qyzmet etý edi. Ekrandaǵy symbaty men únine, saxnadaǵy somdaǵan beinelerine ulty uiydy, eli eltidi, kórermeni tebirendi. Qandai beineler edi?! Syrym, Kebek, Qozy, Álibek, Úkili Ybyrai, Balýan Sholaq, Hakim Abai, Muqaǵali, Shámshi - bulardyń barlyǵy Erlan Biláldiń tek akter emes, adami maxabbaty men janynyń bir bólshegine ainalyp ketti. Olai bolatyn jóni de bar. Ájeniń áldiin tyńdap ósken, Ákeniń taǵylymyn boiyna sińirgen, Ananyń aq sútin emgen adal ul - Erlannyń ózegi myqty, tamyry tekti.
Kalaf, Treplev, Otello, Vershinider - úlken óner iesi ekendigin dáleldegen shoqtyǵy biik beineler. Sondyqtan Táýelsiz Qazaqstannyń akterlik ónerinde esimi eren atalatyn Erlan Bilál jiyrma alty jyldyń ishinde óziniń shyǵarmashylyǵymen, somdaǵan xalyqtyq keiipkerlerimen - Ulttyq Rýxtyń xrestomatiiasyn jazysty. Saxna maidanynda myń ólip, myń tirilip júrip Tulǵaǵa ainaldy. Shákirtterge bilim berýdegi Ustazdyq eńbegine de kýámiz. Eń bastysy, elin súietin Arda-Azamatqa ainaldy.
Ómirlik serigi Maigúl ekeýi ulyqty uldar men qylyqty qyz tárbielep otyrǵan ónegeli otbasynyń iesi. Nemere súiip otyrǵan ardaqty Ata. Bilálovter otbasynda keremet úilesim bar. Ony dostary retinde óz kózimizben kórip, kýá bolyp ta júrmiz. Jazbany aiaǵyna deiin oqýǵa shydamy taýsylyp otyrǵan bázbireýler somdaǵan beinelerin sanamalap advokat bolýdyń qajeti joq deýi de múmkin. Qajeti bar! Azamattyń basyna syn saǵat túskende tabalamaǵan, dattamaǵan, kústánalamaǵan xalyqtyń perzenti edik. Erlannyń abyroiy - ónerde júrgen zamandas, qurdas, dos-baýyr bárimizdiń abyroiymyz! Abyroiymyzǵa asyǵys pikir aityp, las jaqpaiyq degim keledi.
Uiyp otyrǵan ujymyn shýlatyp, shańyraǵyn jylatyp "Migittiń" isin jasaǵan kisiniń kim ekenin bilmeimin! Tanyǵym da kelmeidi! Erlandy orǵa jyqqysy kelgen pendeniń de Alladan alatyn jazasy bar! Azamatty aiaǵynan shalý - ultty ósirmeidi! Ómir de eshkimge jamandyq oilamaityn Erlandy dál qazirgi sátte jigerlendirgim keledi.
Basyńa bult úiirilgen osy sátte, Seni qorǵamasaq, bizdiń kim bolǵanymyz! Jer basyp júrgen pendeler - Adam taǵdyry oiynshyqqa ainalmaýy tiis! "Bolmasyn" degen - ońbasyn! Tabalaityn da tabylar, kúletinder de tabylar! Bireýge jamandyq tileý - jaqsylyqqa aparmaidy! Erteń aldynan ne kútip turǵanyn eshkim de bilmeidi. Tek óner áleminde ǵana emes, bizdiń qazaq qoǵamynda meiirim men adami maxabbat saltanat qursa eken, ylaiym!
Meiirimdi bolaiyqshy, Bárimiz! Erlan - Qazaqtyń Asyl Azamaty!!! Bul kún de óter!!!
Qazaqstannyń eńbek sińirgen qairatkerleri - Asxat Maemirov, Gúlsina Mirǵalieva
