«Qazaq titan» laqap atymen tanymal almatylyq Almat Jumanov 24,5 tonnalyq áskeri ushaqty súirep, Qazaqstannyń rekordtar kitabyna endi, dep habarlaidy QazAqparat.
Qazaqstan rekordtar kitaby tirkeý departamentiniń direktory Baqytjan Tastúlekov Almat Jumanovtyń nátijesin resmi túrde tirkep, esepke alyp, sertifikatyn tabys etti.
«Búgin Almat kezekti rekordyn jasady. Budan buryn Naýryz meiramynda osy ushaqty 6 metrge tartqan eken. Sony qaitalaimyn dep, bizdi shaqyryp edi. Biraq, 6 metrge tarta almady. Degenmen, bul - Qazaqstanda alǵash ret bolyp tur. Sondyqtan, biz ony rekord dep esepteimiz jáne tirkeimiz», - dedi ol.
«Naýryz merekesi qarsańynda osy ushaqty 6 metrge tartyp, jańa rekord jasaǵan bolatynmyn. Búgin ókinishke orai, bir metrge ǵana tarta aldym. Sebebi, búgin biraz jel soǵyp turdy jáne kishigirim jaraqattarym bar. Sol úshin ózimdi qatty qinaǵym kelgen joq. Jalpy, bul - meniń úshinshi rekordym», - dedi Almat Jumanov.
Almat Jumanovtyń jasy 24-te. Ol buǵan deiin de Qazaqstan rekordtar kitabyna engen. Atap aitqanda, 109 tonnalyq poiyz vagonyn 8,5 metrge súiregen. Odan keiin 300 kelilik túieni iyǵyna artyp, bir-birine jalǵanǵan úsh kólikti beline arqanmen bailap, bárin qosyp 13 metrge qozǵaltady.
Sondai-aq, ol aldaǵy ýaqytta álemdik deńgeide rekord jasaitynyn aitty.
«Mamyr aiynda 300 tonnalyq poiyzdy tartqaly júrmin. Ony oryndasam, álemdik rekord jasaimyn. Sebebi, ony áli eshkim jasaǵan joq. Ózim negizi fitnes trenermin. Jalpy, bulshyq etterge jattyǵý jasaimyn. Maqsatym - shetelge Qazaqstanda osyndai myqty jigitter bar ekenin kórsetý. Elimizdiń atyn shyǵarý», - dedi qara kúshtiń iesi.
Aita ketsek, Qazaqstan rekordtar kitabyna 2,5 myńnan astam rekord engen.
«Jylyna 30-40 rekord tirkeledi. Biraq, onyń bári kitapqa kirmeidi. Sebebi, jańa rekord jasalǵan soń, biraz ýaqyttan keiin basqa bireý ony basyp ozýy múmkin. Sondyqtan, bizdiń kitapqa tek eń úzdik, eń myqty adamdardyń esimderi jazylady. Jalpy, álemdik Ginness rekordtar kitabyna qazaqstandyq 20-dan astam adam engen», - dedi Baqytjan Tastúlekov.
