Qazaqstan Respýblikasynyń Qorǵanys ministri Nurlan Ermekbaev Prezident Jarlyǵyna sáikes uiymdastyrylyp jatqan arnaýly jiyndardyń merzimi men áskeri mindettilerdiń qajetti sanyn jergilikti atqarýshy organdardyń ózderi aiqyndaitynyn málimdedi, dep habarlaidy "Ult aqparat".
«Qarýly kúshterdiń óńirlik áskerleri aimaqtyq qorǵanysty saqtaýǵa, sonymen birge tótenshe jaǵdai tártibiniń saqtalýyna jaýapty. Iaǵni áskeri mindettiler basqa aimaqtarǵa jiberilmeidi. Óńirlik áskerlerdiń bólimsheleri ishki ister organdarymen birlesip, blok-posttarda mindetin atqaryp, patrýlge shyǵyp, nysandardy kúzetip, sý tasqynyna qarsy sharalarǵa atsalysyp, dezinfektsiia jumystaryn júrgize alady. Qazirgi ýaqytta elimizde óńirlik áskerlerdiń jyl saiynǵy jiynyna qatysýda tájiribeleri barshylyq. Arnaýly jiyndardyń merzimi men áskeri mindettilerdiń kerekti sanyn jergilikti atqarýshy organdardyń ózderi aiqyndaidy», - dedi Nurlan Ermekbaev OKQ-da ótken baspasóz máslihatynda.
Ministrdiń aitýynsha, arnaýly jiyndarǵa áskeri esepte turǵandar jáne densaýlyǵy jaramdy azamattar shaqyrylady.
«Jasy úlken, otbasylyq jaǵdaiy qiyn nemese densaýlyǵynda aqaýy bar azamattardy shaqyrýdyń qajeti joq. Sebebi bizde adam resýrsy bar. Zańǵa sáikes arnaýly jiyndardan qorǵanys, quqyq qorǵaý, qaýipsizdikke qatysty memlekettik organda jumys isteitinder, aviatsiialyq personal, kóktemgi egis jumystary kezine aýyl sharýashylyǵy salasynda eńbek etetinder, pedagogikalyq kadrlar, bilim berý uiymdary men organdarda ishtei oqyp jatqan azamattar, áielder, 18 jasqa deiingi úsh balasy bar azamattar, sonymen qatar tergeýdegi nemese protsessýaldyq iske tartylǵan azamattar bosatylady. Sonymen qatar jergilikti atqarýshy organdardyń depýtattary da arnaýly jiynǵa shaqyrylmaidy», - dedi ol.
Eske sala ketsek keshe Qazaqstan Prezidenti áskeri mindettilerdi arnaýly jiynǵa shaqyrý týraly Jarlyq shyǵarǵan edi.
Atap aitqanda qazaqstandyqtar jekelegen óńirlerde meditsinalyq qyzmet, tasqynmen kúres jáne dezinfektsiia jumystaryna shaqyrylady.
