Qazaqstan Respýblikasynyń Qarýly Kúshterinde jaýyngerlik daiarlyq jospary boiynsha bólimshe quramynda is-sharalar jalǵasýda, dep habarlaidy "Ult aqparat" QR Qorǵanys ministrliginiń baspasóz qyzmetine silteme jasap.
Baspasóz qyzmetiniń málimetterine qaraǵanda, jaýyngerlik daiarlyq jumystarynyń barlyǵy eldegi sanitarlyq-epidemiologiialyq ahýaldy eskere otyryp, barynsha urys jaǵdaiyna keltirilip júrgizildi. Sonymen qatar, COVID-19 ári qarai taralaýyn joiý jóninde sharalar qabyldanýda.
Qazirgi ýaqytta elde COVID-19 taralý qarqyny artyp keledi. «Qyzyl» aimaqta Astana, sondai-aq Aqmola, Atyraý, Qostanai jáne Pavlodar oblystary ornalasqan. Osyǵan qaramastan, QR Qarýly Kúshterinde syrqattanýdyń ósýi tómendegeni baiqalady.
QR Qorǵanys ministri general-leitenant Nurlan Ermekbaev qorǵanys vedomstvosynda ótken apparat keńesinde Qarýly Kúshterdegi epidemiologiiaǵa qarsy ahýal týraly Bas áskeri-meditsinalyq basqarmanyń aqparatyn tyńdady.
Sońǵy jeti táýlikte áskeri qyzmetshiler arasynda COVID-19 juqtyrý jaǵdaiy ótken aptaǵa qaraǵanda 16%-ǵa tómendedi.
Qarýly Kúshterdiń eki PTR-zerthanasy bazasynda 800-den astam diagnostikalyq zertteýler júrgizildi. Aqtaý men Semeide taǵy eki jańa meditsinalyq zerthana keshenin óristetý boiynsha sharalar qabyldandy, olardy paidalanýǵa berý úshin qajetti qujattar resimdeledi.
«Qyzyl» aimaqtaǵy jeke quramnyń keminde 80 paiyzy qashyqtan jumys isteý túrine aýystyrylatyn bolady, buqaralyq is-sharalar men toptyq sabaqtar ótkizýge tyiym salynady.
Kelisimshart qyzmetiniń áskeri qyzmetshileri úshin mamandyq boiynsha oqytý baǵdarlamalary jáne úi jaǵdaiynda oryndaýǵa arnalǵan dene jattyǵýlarynyń kesheni ázirlendi. Karantinnen shyǵý boiynsha áskeri qyzmetshilerdiń dene daiarlyǵy deńgeiin jáne oqý materialyn meńgerý sapasyna tekserý uiymdastyrylady.
Qorǵanys vedomstvosynyń basshysy Qarýly Kúshter men bólimshelerdiń basshylyǵyna karantin rejimin saqtaý máselelerin erekshe baqylaýda ustaýdy, sondai-aq taiaýdaǵy toqsan ishinde eldegi epidemiologiialyq ahýaldyń kúrt shielenisýine jedel den qoiýdy tapsyrdy.
QR Qorǵanys ministrliginde ótken apparattyq keńeste qysqy jaǵdailar men koronavirýstyń taralýy jaýyngerlik daiarlyqtyń josparlanǵan is-sharalaryn iske asyrý qajettiligin joimaitynyn, sonymen qatar, onyń barysyna udaiy túrde nazarǵa alynatynyn atap ótti.
Qazirgi ýaqytta bazalyq áskeri býyn - bólimshelerdi daiarlaý naqty atys mindetterin sheshýmen ártúrli urys túrlerindegi is-qimyldar kezinde ózara is-qimyldyń úilesimdiligin jetildirýge, bólimsheler komandirlerin óz baǵynystylaryn basqarýǵa úiretýge, jeke quramnyń dalalyq daǵdysyn jetildirýge baǵyttalǵan.
Áskeri atys alańdary men oqý-taktikalyq poligondarda aǵymdaǵy daiyndyqtyń sońǵy kezeńinde dástúr boiynsha oqytýda paidalanylatyn qarý-jaraqtyń barlyq túrlerinen jaýyngerlik atys ótedi. Bul rette atystardyń kem degende 30%-yn ótkizý táýliktiń túngi ýaqytynda josparlanǵan.
Qubylmaly áskeri-taktikalyq jaǵdailardy eskere otyryp, QR Qorǵanys ministri fortifikatsiialyq qurylystar men injenerlik pozitsiialardy jabdyqtaý, ushqyshsyz ushý apparattaryna qarsy is-qimyl elementteri boiynsha sabaqtar ótkizý qajettigin atap ótti. Bul rette general-leitenant N. Ermekbaev barlyq deńgeidegi komandalyq quramnyń nazaryn jattyǵýlar ótkizý kezinde qaýipsizdik sharalaryn saqtaýǵa aýdardy.
- Dala sabaqtarynda jeke quramnyń sýyqtap qalýy men úsik shalý oqiǵalaryn boldyrmaý jaily sharalar qabyldaý qajet. Jylyný pýnktterin ashyp, áskeri qyzmetshilerdi jyly kiim-keshekpen jáne ystyq tamaqpen qamtamasyz etý kerek, – dep atap ótti ol.
